Finn Karlsen ulappuserpoq - Upernavik Seafood ammarneqalerpoq

Ataasinngorpat Upernavik Seafood ammarneqassaaq, ukiuunerani qaleralinnik tunisisoqarnissaanut naammattumik qerititsivissaqannginnera pissutaalluni tunitsiviit matoqqasimagaluartut ammarneqassapput.

- Ullaaq arfineq pingasuinnanngortoq Upernavik Seafoodip pisortaa sianerfigaara, oqaloqatigigaara - nuannersumik oqaloqatigiippugut. Ataasinngorpat ammassavai matoqqasut tamaasa, Finn Karlsen oqarpoq.

Taassuma erseqqissaatigaa ammaanissamut tunngatillugu qularnaveeqqusiisoqarsimanngitsoq:

- Qularnaveerserneqanngillat, neriorsorneqanngillat aamma piumasaqarfigineqanngillat. Qanoruumut ippassaq oqarpunga neriullunga Upernavik Seafood periarfissaqaruma oqaloqatigisinnaasallugu, aqaguluunniit ullumikkulluunnit. Taamaasiorpungalu, nuannersumik oqaloqatigiippugut, Aalisarnermut piniarnermut nunalerinermullu naalakkersuisunngorlaaq oqarpoq.

Aalisarnermut inatsi allanngortinneqarnissaanut siunnersuut Naalakkersuisut siulittaasuat ukiortaami oqalugiarnerminni sukataarussutigileraluagaa arlalinnit isornartorsiorneqarpoq.

Inuit Ataqatigiit, GA-lu ilaatigut aarleqqutigaat tunisassiortut aalisariutinik piginnittuusinnaassanngippata, tunisassiorfinnik matooraasoqartariaqalersinnaanera amerlanerusut suliffissaaleqilernerannik kinguneqarsinnaassumik. Naalakkersuisoqataasullu Atassut aamma isornartorsiusuupput, oqartussat soqutigisaqartullu tusaaniarneqaqqaartariaqartut Atassutip isumaqarfigaa.

Naalakkersuisunngorlaarlu Finn Karlsen aalisarnermut inatsit allanngortinneqarnissaanut siunnersuutaasimagaluartoq illuatungilersimavaa. Suliffissaaleqinerup annertusinissaa aarleqqutigimmagu.

Finn Karlsenip aalisartut tusarnaaqaarusuppai.

- Uanga pingaarnerpaatippara aalisartut isumasioqatigereernerani inatsimmik sananissaq. Tamannalu tamatta isumaqatigiissutigaarput qujanartumik, Finn Karlsen oqarpoq.

- Aalisarnerup iluani attuumassutillit tamaasa tusarneqareerpata aatsaat allannguutissatut siunnersuutit isummerfiginissaat pingaaruteqartut isigaara. Tamannalumi qujanartumik tamatta isumaqatigiissutigaarput, Aalisarnermut, Piniarnermut Nunalerinermullu Naalakkersuisoq Finn Karlsen oqarpoq.

Upernavik Seafood A/S-ip naalakkersuisup Finn Karlsenip suleqatiginissaa qilanaarivaa, suliffissuillu ammaqqinneqarnissaat pillugu isumaqatigiissummut atatillugu Naalakkersuisoq Upernavimmut qaaqqusimallugu, inuussutissarsiummi soqutigisaqartut tamarmik naapillutik isumassarsiaminnik, suliniutissanik nutaanik Upernaviullu aqutsisoqarfiani aalisarnerup iluani misilittakkanil paarlaasseqatigiinnissaat siunertaralugu.