Finn Karlsen: Uanga manngertitaaginnarsinnaanngilanga

Aalisarnermut inatsisissatut siunnersuut susassaqartunit tamanit oqallisigineqangaatsiareerluni inatsisartuni aappassaaneerneqarnissaa inatsisartut aappaagu upernaami ataatsimiinnissaannut kinguartinneqarpoq.

- Uanga manngertitaaginnarsinnaanngilanga inatsisartut taamatut oqarpata. Aalisarnermut piniarnermullu naalakkersuisoq Finn Karlsen oqarpoq, nangipporlu:

- Atoruminarnertai ajornartorsiutitaqanngitsut inatsisinngorlugit ukiaq manna suliarineqarsinnaagaluarput aappaagulu januaarip aallaqqaataaniit atuutilersinneqarlutik. Ataatsimiititaliami suliassanngortinneqartut upernaamut naammassineqassasut neriuutigaara. Ataatsimiitialiaq sivisuumik sulisussaavoq, taamaammat uggorilaarpar, imaassinnaammammi upernaamut kinguaqqeriataartoq, Finn Karlsen oqarpoq.

Inuit Ataqatigiit oqarput aalisarnermut inatsisissatut siunnersuut annertuallaamik piginnaatititsissummik naalakkersuisunut tunniussinerusoq.

Aalisarnermut tunngassuteqartunik oqaaseqartartoq Ane Hansen ima oqarpoq:

- Inatsisissatut siunnersuut partiinit tamanit naammagineqanngitsorujussuaq malunnarpoq, aalisarnermullu inatsisissamut tunngatillugu naalakkersuisoqatigiinni isumaqatigiinngissuteqartoqartoq aamma malunnarpoq, Ane Hansen oqarpoq.

Aalisarnermut inatsisissap inatsisartuni sammineqarnissaa kinguartinneqarmat ajuusaarutigigini Kattusseqatigiit Partiaata siulittaasuata Anthon Frederiksenip oqaatigaa, inuutissarsiortut eqqaarsaatigalugit inatsisissap kinguartinneqarnera ajuusaarnartoq:

- Inatsisissap ukiaq manna nammassineqarluni suliarineqarnissaa inuutissarsiortut qilanaarisimagaluarpaat, kisianni tassa torinngitsorujussuarmik suliaasimasoq tusarniaanerup kingorna paasinarsivoq. Nuanniippoq taamatut suliarilluagaanngitsigaluni saqqummiunneqarmat, Anthon Frederiksen Kattusseqatigiit Partiiaanneersoq oqarpoq.

Siunnersuutit assigiinngitsut susassaqartunit assigiinngitsunit saqqummiunneqartut imminnut naapitinniarneqarnissaat orniginartikkitsik Anthon Frederiksenip aamma oqaatigaa.