Finn Karlsen tunngavilersuivoq!

Piniarnermut Naalakkersuisup Finn Karlsenip Canadamut puisit amiinik pisiortorunnaarnermik aalajangerneq tunngavilersorpaa.

- Taamaasiorsimanngikkutta suna tamarmi niparrutigineqarsimassagaluarpoq, aamma ilissi ingattarsingaarlusi tusagassiungaarsimassagaluarpusi, suna tamarmi sequmeriaannaasimassagaluarpoq taamaasiorsimanngitsuugaluarutta.

- Qanoq soorlu sequmissagami?

- Kalaallit Nunaanni puisinniarneq sequminnikuuvoq, immaqa ilissi suli inuusuttuaraanissi imaqaluunniit suli meeraanissi nalaani. Taamatut pisoqaqqinnginniassammat sukkanerpaamik qisuariarpugut, Finn Karlsen oqarpoq.

Puisit amiinik Canadami pisisarnerup taamaatinneqarneranik naalakkersuisut aalajangertariaqarneranut peqqutaasoq pillugu, piniarnermut naalakkersuisoq Finn Karlsen taama tunngavilersuivoq.

Kunngit pingasut ulluanni januaarip arfernani Naalakkersuisut tusagassiortunut allagaanni oqaaseqatigiit siulliit ima allassimapput, issuaaneq aallartippoq: ”Naalakkersuisut ullumi ataatsimiinnerminni Great Greenland A/S-ip Canadami puisit amiinik pisiortortarnera taamaatinneqarnissaa aalajangiunneqarpoq” issuaaneq naavoq.

Tusagassiutinulli nalunaarummi Nunavut allassimanngilaq.

- Uanga taanna akuleruffiginaveersaaqqissaagara piniariaatsit assigiinngutsut ilaa kalaallillu canadamilu toqoraasarnerit assigiinngitsut taakkua akuleruffiginaveersaarpakka, New Founlandip eqqaani piniartarput allarluinnarmik, kisianni Nunavukkormiut uagutsitorpiaq piniarput, Finn Karlsen oqarpoq.

Taanna aperaarput, piaarpallaamik aalajangernertik peqqissimissutiginnginneraat.

- Naamerluinnaq, Canadami pisiniaqqinnavianngilagut oqareernikuuvugut, pisissagutta taamaallaat Nunavumi pisissuugut, Finn Karlsen oqarpoq.

Januaarilli 19-ianni radioavisimi ilanngupparput, Nunavumi ministeriuneq Paul Okalik nunatsinnukartussanngormat, Finn Karlsen oqarsimasoq, canadamit puisit amiinik pisiortorunnaarnermik aalajangernertik allanngortinneqassanngilluinnartoq.

- Massakkut aamma allatut oqarputit naak januaarip 19-iani oqareerlutit aalajangiussarsi allanngortissanngitsoq, qaqugu aalajangersimaqqinnerusumik aalajangiussissagassi?

- Aperissavakkit, Nunavulu Canadalu immikkoortissinnaanngilisigit?

Finn Karlsen taama apeqqummut akivoq.

Erseqqissaatigissavarput, Nunavut tassaammat Canadamiikkaluarluni Kalaallit Nunatsitulli nuna namminersornerulersimasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat