Finn Karlsen suleqatigiittoqarnissaanut kaammattuivoq

Aalisarnermut, piniarnermut nunalerinermullu naalakkersuisoq, Finn Karlsen, ilaatigut taama inerniliussaqarpoq aalisarneq pillugu isumasioqatigiinneq naammassineqarmat.

Aalisarnermut Naalakkersuisup aamma inuusuttut aalisarsinnaanermut akuersissutinik ajornannginnerusumik tunineqartalersinnaanerat suliniutiginiarpaa. Aalisarneq pillugu isumasioqatigiinnermi, ippassarlu naammassineqartumi ilaatigut taama oqarpoq.

Isumasioqatigiinnerup siunertaraa Nunatsinni aalisarnermi unammilligassat suussusersineqarlutillu eqqartorneqarnissaat. Isumasioqatiginnermi aalisartut aalisarnermullu attuumassuteqartunik suliaqartut katillutik 140-t missaanniittut peqataapput. Isumasioqataasut ilaat aamma tassaapput naalakkersuinermik suliallit atorfilittallu.

Aalisarnermut, piniarnermut nunalerinermullu naalakkersuisoq, Finn Karlsenip, aalisartut aalisakkerivinnillu ingerlatsisut suleqatigiilluarnerunissaat kaammattuutigaa:

- Tunitsivinnik pigisaqartut kiisalu aalisarnermik ingerlataqartut taakkuullutik immikkut pisussaaffeqarput, tassalu suleqatigiilluni ingerlatsinissaq. Aalisartoq tunitsivissaqanngikkuni aalisarsinnaanngilaq, tunitsivillu aalisagassaqanngikkuni tunisassiorsinnaanani, Finn Karlsen taama kaammattuivoq nangillunilu:

- Aalisartut tunisassiortullu suleqatigiinnerusariaqarput. Sinerissap qanittuani aalisariutit pisoqalisimasut nutarternissaat piffissanngorluinnarpoq.

Finn Karlsenip isumasioqatigiinnermi naggataarutaasumik oqalugiarnermini ilaatigut aamma oqaluttuaraa Naalakkersuisoqarfiata inuusuttut aalisarnermut akuersissummik ajornannginnerusumik tunineqartalernissaat siunertaralugu suliaqarlutik aallartissimasut:

- Tamanna suleqatigiilluta ingerlattariaqarparput. Aalisariutit nutaaliat aamma inuusuttut aalisarnermut kajuminnerulernerannik kinguneqassaaq. Ataavartumik kinguaariit nikikkiartuaarnissaat aalisarnerup ingerlaannarnissaanut pingaaruteqarluinnarpoq.Taamaattumik inuusuttut ajornannginnerungaartumik aalisarsinnaanermut akuersissummik pissarsisinnaanissaat sulissutigaarput, Finn Karlsen naggataarutaasumik oqalugiaammini ilaatigut taama oqarpoq.

Finn Karlsenip biologit aalisartullu kattuffiisa Pinngortitaleriffimmi siulersuisuni ilaasortaatitaat aqqutigalugit suleqatigiinnerunissaat kaammattuutigaa.

Isumaqatigiinnermi saqqummiussorneqartunik suliareqqiisussamik ataatsimiititaliamik aamma pilersitsisoqassaaq.