Finn Karlsen: Suleqatigiilluni aaqqinneqarsinnaapput
Suliffissuarnik ikilisaanerup kingunerisaanik sinerissap qanittuani aalisartut atugaat ajorsiartuinnarsimapput, pissutsillu aaqqiivigineqartariaqartut, aalisartut piniartullu kattuffiata, KNAPK-p, siulittaasuat Peter Olsen ilaatigut taama nipeqartumik naalakkersuisunut ammasunik allagaqaateqarpoq.
KNAPK ammasunik allagaqaateqarnerminni, piumasaraat sinerissap qanittuani raajarniat killilersorneqartumik tulaassisarnerisa aaqqissugaanerusumik ingerlanneqartalernissaat.
Tulaassisarnerit skema-lersorlugit ullumikkut ingerlanneqartarput, KNAPK-miillu tamanna killilersuinertut nalilerneqarpoq.
Aalisarnermut piniarnermullu naalakkersuisup Finn Karlsenip, ajornartorsiut eqqummaariffigaa, oqarlunili aaqqiiviginiarneqassappat Royal Greenland suleqatigineqartariaqartoq:
- Uagut tungitsinninngaanniit aaqqiiviginiarneqassappat ajornakusoortorujussuuvoq, aaqqinniarneqassappallu pinngitsoornata Royal Greenland-i suleqatigeqqissaartariaqarparput, Finn Karlsen oqarpoq.
Royal Greenland-ip Aasianni Narsamilu raajaleriffiisa soqutiginnittunut namminersortunut tuniniarneqarsinnaanissaat KNAPK-p aamma ujartorpaa, aalisarnermullu naalakkersuisup taamaaliortoqarsinnaanissaanik siunnersuuteqartarsimagaluarpoq:
- Siullerpaallungaluunniit immaqa uanga taamatut oqaluttarpunga. Royal Greenland-i ataatsimeeqatigisarparput, Royal Greenlandillu nalunngilaa qanoq piumasaqartunga, kisianni piumasakka tamarmik pineq ajornartaqaat, Finn Karlsen oqarpoq.