Finn Karlsen: Raajartassat 30 procentimik ikilisinneqassapput

Raajat aappaagu 2008-mi tulaanneqartussat siornarnit malunnaatilimmik ikinnerussapput. Aalisarnermut naalakkersuisoq Finn Karlsen taama oqarpoq, inatsisartunut ilaasortaq Anthon Frederiksen-ip apeqquteqaataanut akissuteqarnerminut atatillugu.

Anthon Frederiksen apeqquteqarpoq, raajartassat 30 procentimik annikillisinnissaat Naalakkersuisut aalajangiusimaniarneraat.

Finn Karlsen akissummini allappoq, ilumoortoq, 2008-imut raajartassiissutinut siunnersuinerup kingunerissagaa, raajartassiissutit malunnaatilimmik ikilinissaat, kisianni erseqqissatigaa naalakkersuisut raajartassiissutissanik suli aalajangiinngimmata. Aappagumut raajartassiinissamut qanoq igitassiisoqartarnissaa aamma allanngortussaasoq, Finn Karlsen-ip Radioavisimut oqaatigaa.

- Suli aalajangerneqanngilaq, ajornikutut igitassat procentissaa qassiussanersoq, kisianni oqarpugut, tamarmik akuerisinnaasaannik procentiliisariaqartugut, nunanullu sanilerisatsinnut naapertuutikannersumik sapinngisamik igitassiisoqartarnissaq procentilerneqartariaqartoq, tassami sanilitsinnut naleqqiulluta aalisartortatta igitassiisarnerat qaffasissorujussuuvoq,Finn Karlsen oqarpoq.

Tassalu inernerisariaqassavaa, raajarniat ukiormannarnik ikinnerunmgaartunik ukioq manna tulaassissasut?

- Tassami Naalakkersuisooqatigiit pingaartilluinnaqqissaarpaat, piujuaannartitsinissamik tungavilimmik uumassusilimmik atuinissarput. Kisianni oqarsinnaanngilanga, pisassat 15,3 procentiinik appaanissamik inassut maleqqissaassaneripput. Kisianni appaasoqarnissaa qularnangilaq. Biologit innersuussutaat tusareerpavut, maanna aalisarnermut siunnnersuisooqatigiit tusarnissaat tullinnguuppoq, aalisarnermut naalakkersuisoq, Finn Karlsen, naggasiivoq.

Raajartassat ikilisinneqarnissaannik biologit kaammattuereersullu Royal Greenland-ip pisortaanera, Flemming Knudsen, oqarpoq, raajartassat kittaartumik ikilisikkiartuaarneqartariaqartut, aalisartut, tunisassiorfiit sulisullu allannguinermut naleqqussarsinnaaniassammata.