Finn Karlsen raajanut akitsuusigaanngitsunut akerlioqqusivoq

Canadamiut raajartaminnik akitsuusigaanngitsunik europamut tunisaqartarnerisa periarfissarissaarnerulernissaannik EU-p isummersuuteqarneranut inuussutissalerinermut ministeri akerlilersueqqullugu Finn Karlsen siunnersuuteqarpoq.

Canadamiut raajartaannik akitsuusigaanngitsunik Europamut eqqussuisinnaanerup ukiunik marlunnik sivitsorneqarsinnaanera EU-mi massakkut nalilersorneqarpoq. Raajanillu akitsuusigaanngitsunik eqqussuisinnaaneq sivitsorneqassaguni nunatta raajanik avammut tunisassiorneranut eqquinerluttussaasoq Finn Karlsen isumaqarpoq.

Tamanna pillugu Finn Karlsenip danskit inuussutissalerinermut ministeriat Hans Christian Schmidt siunnersorpaa Canadamiut raajanik akitsuusigaanngitsunik eqqussuinerminni periarfissarissaarnerulernissaannut akerlilersueqqullugu. Tamatumunnga Hans Christian Schmidt ima akivoq:

- Raajanik akitsuusigaanngitsunik Canadamiut europamut eqqussuinerat sivitsorneqassappat Kalaallit Nunaanni avataasiorluni raajarneq kisimi pinnani aammali sinerissap qanittuani raajarniarneq nunamilu raajaleriffiit eqqugaassasut, Finn Karlsen oqarpoq, ernumaneralu paasilluarsinnaavara, tamannalu uannnut sunniuteqanngitsuunngittoq oqartariaqarpunga, Hans Christian Schmidt oqarpoq nangillunilu:- Nunarpassuit aamma soorlu Danmark Canadamit raajanik akitsuusigaanngitsunik annertuumik pilersorneqartoq allaat tunisasssiornikkut eqqugaasinnaammata, inassutigineqartut tusarpakka allallugillu, Hans Christian Schmidt oqarpoq.