Finn Karlsen: Paatsuunganartumik oqaaseqarsimaguma ajuusaarnarpoq
Aalisarnermut Piniarnermullu Naalakkersuisup Finn Karlsen Great Greenlandimik misissuinermut tunngasunik ullumi oqaaseqarnermini oqarpoq
Great Greenlandimik misissuisitsinissamut atatillugu misissuinissap suliamut attuumassuteqanngitsunit suliarineqarnissaa naalakkersuisunit isumaqatigiissutigineqarluni aalajangerneqaraluartoq, atorfilittanit allanngortinneqarsimasoq, tassa Great Greenlandip naatsorsuuserisuisa kukkunersiugaat misissuinermi atorneqartussanngortinneqarsimasut tamannalu pissutigalugu misissuinerup uppernassusia inernilerneqarneralu apeqqusertariaqartut. Tamatumalu saniatigut aalisarnermut piniarnermullu naalakkersuisup Ammerivimmi sulisunut kaammattuuteqarpoq pissutsinik qulaajaaqqusilluni. Finn Karlsen ullumi oqarpoq Canadamiut amiutaannik amigartoorutaasunik kalaallillu amiutaannik paarlaassuisoqartarsimanersoq paasissallugu pingaartikkini, taamattoqarsimassappat kalaallit piniartortatsinnut nikassaasoqarsimassammat. Taama oqaaseqarsimanermi naalakkersuisoqatiminit paatsuunganartutut tiguneqarsimanera Finn Karlsenip, naalakkersuisuni ullumi ataatsimeeqataareerluni anillakkami ajuusaarutigaa:
-Ajuusaruutigissavara naalakkersuisooqatinnut paatsuunganartunik oqaaseqarsimagama, oqaatsikka paatsuunganartutut tigusimammassuk. Aamma erseqqissumik oqaatiginiaraluarpara tusaatissatut taakku uanga tigullugit. Aamma naalakkersuisunut radioavisimut Qanoruumullu taama oqarpunga. Kisianni taanna erseqqinnerusimasariaqaraluarpoq; tassa tusaatissatut taakku pinngitsoornatik tiguakka.
Great Greenlandimi sulisunut saqqummiusseqqusilluni oqaaseqarsimanini aalajangiusimanerini aperineqarami Finn Karlsen oqarpoq, taakku namminneerlutik qanoq isiornissartik aalajangertariaqassavaat, uagut una suliarisarput naammassivarput taannalu tusaatissatut tiguarput. Tamakku pineqassappata naalakkersuisut qanoq isiornissaat soorunami killeqarpoq, uagulli inuttut ataasiakkaarluta partiitulluunniit taama piumasaqarsinnaavugut, taannalu partiip iluani eqqartortariaqarparput, Finn Karlsen nangippoq, oqarluni eqqartuinissap ulluni qaninnerni pinissaa naatsorsuutigigini.
Naalakkersuisooqatigiinnut ilaasut Inuit Ataqatigiit siulittaasuat Josef Motzfeldt naalakkersuisoqaatigiit ataatsimeereersullu oqarpoq Naalakkersuisut siulittaasuata Aalisarnermut piniarnermullu naalakkersuisup akornanni qanoq aaqqiisoqarnissaa naalarneqqaarniaqaritsik, tassanngaanniit oqaaseqarumaarlutik, Josef Motzfeldt oqarpoq.
