Finn Karlsen: Paasissutissanik isertuunneqarsimavunga

- Paasissutissanik isertuunneqarsimavunga, Finn Karlsen oqarpoq, nangilluni oqarpoq uppernarsarsinnaallugu qanorpiaq pisoqarsimaneranik.

- Eqqortoq ajugaasariaqarpoq!

Finn Karlsen KNR-imut taama naqissusiivoq. Qanoq pisoqarsiamneranik uppernarsaatinik tigummiaqarluni Finn Karlsen oqarpoq, aammalu taakku kikkunnut tamanut saqqummiunneqartariaqartut oqarluni.

- Issuarneqarnera naammaginnginnakku allaaserinnissinnaasumik nassaariarluga, ilisimasakka eqqortumik allaaserissavakka. Finn Karlsen oqarpoq.

Siorna ilisimaneqalerpoq Royal Greenland aningaasarliortorujussuusoq. Tamannalu tunuliaqutigalugu Kalaallit Nunaanni suliffeqarfissuit annersaat 500 millionit koruuninik Naalakkersuisunit taperneqarpoq.

Royal Greenlandimik annaassiniarnerup qanoq ingerlasimaneranik paasiniaaneq maanna naammassisimalerpoq. Paasiniaanerup ersersippaa, Aalisarnermut Naalakkersuisuusimasup, Finn Karlsenip, aningaasarliorneq ilisimasimagaa. Taamatut pisuutitsinermut Finn Karlsen ima akivoq:

- 2005-imi Naalakkersuisunngoramali Royal Greenlandip aningaasarliornerata aarlerinartoqarnera isumaqarfigigakku, arlaleriarlunga saqqummiuttarpara, tamannalu massakkut Naalakkersuisuusut nalunngilaat, Finn Karlsen oqarpoq.

Taanna aamma oqarpoq, siorna juunimi naalakkersuisunngoqatigiinnissaq siunertaralugu isumaqatigiinniarnermi sallunerarneqarsimagami.

- Una oqaatigineqaqqittariaqarpoq, siorna Naalakkersuisoqatigiinnissamik isumaqatigiinniartoqarnerata nalaani sallunerarneqarama taamani oqarpunga, uanga sallullunga tamanna pillugu oqarsinnaaginnama, oqaatigalugu nalunaarusiaq utaqqigatsigu, Finn Karlsen naggasiivoq.