Finn Karlsen nassuiaaqquaat
KNAPK isumaqarpoq saattuarniarnerup unitsikkallarneqarnissaannik naalakkersuisut aalajangiinerat atorunnaarsinneqartariaqartoq.
KNAPK-p siulittaasua Peter Olsen isumaqarpoq, nuna tamakkerlugu saattuarniarnerup matuneqarallarnissaannik naalakkersuisut aalajangiinerat suut tunngavigalugit pisimanersoq, Aalisarnermut piniarnermullu naalakkersuisup, Finn Karlsenip, nassuiaatigisariaqaraa.
Saattussat qaleruai ataatsikkorsuaq aqilineq ajormata saattuarniartartut KNAPK-lu isumaqarput, matusigallarnissaq allanngortillugu, saattussat sumiiffikkaarlugit matuneqartassasut, nuna tamakkerlugu matuneqartaratik.
- Saattuat pillugit upernaaq isumasioqatigiittoqarmat isumaqatigiissutigineqarpoq feltkodekkaartunik taaneqartartunik, tassa sumiiffikkaartunik matusisoqartassasoq, KNAPK-p siulittaasua Peter Olsen oqarpoq.
Isumasioqatigiinnermi isumaqatigiissutigineqartunut ilaavoq KNAPK-p Aalisarnermut Piniarnermullu Pisortaqarfiullu akornanni suleqatigiinnertalimmik naalakkersuisunut innersuussinissaq. Peter Olsenili oqarpoq tamanna pisimanngitsoq.
- Aalisarnermut pisortaqarfik suleqatigiissutissat kisermaallugit suliarisimavai, isumaqarluinnarpugullu naalakkersuisunut apuussassat kukkusut apuunneqarsimasut, Peter Olsen oqarpoq.
- Aalisarnermut naalakkersuisoq Finn Karlsen inuiaqatigiinnut nassuiaasariaqarpoq sooq nuna tamakkerlugu saattuarniarneq matuneqarsimanersoq, uagummi isumaqarpugut assagiarsuit nuna tamakkerlugu ataatsikkorsuaq aqilineq ajortut, Peter Olsen nassuiaavoq.
KNAPK, Nukik A/S, Maniitsoq Fiskeindustri A/S, kiisalu Tunitsivik Paamiut A/S, naalakkersuisunut saaffiginnissuteqarlutik nunarput tamakkerlugu saattuarniarnerup juulip qaammataa aallarnerfigalugu matuneqarnissaannut aalajangiinerat atorunnaarsikkusuppaat.