Finn Karlsen NAMMCO-mi oqalugiarpoq

Naalakkersuisunut ilaasortap Finn Karlsen-ip ullumi Islandimi Selfoss-imi NAMMCO-p ataatsimiinnerani ammaanersiorluni oqalugiarnermini, puisit amii canadameersut pillugit oqalugiangaatsiarpoq.

-Puisinniarneq nunanilu tamalaani puisit iluaqutiginiarneqarnerisa aqunneqarnerat nunatsinnut pingaaruteqartorujussuuvoq. Taamaammat naalakkersuisut, puisit amiinut tunngatillugu suliffeqarfiit piniartuttalu atugarisaat illersorniarlugit, sukkasuumik aalajangertariaqarsimavugut nunanit allanit puisit amiinik pisisarneq unitsikkallarniarlugu. Tassami ukioq aallartittoq nuanninngitsumik danskit tusagassiorfiini nunatsinni puisit amiinik pisisarnitsinnik oqallinneq aallartinneqarpoq, Finn Karlsen oqarpoq.

-Nunatta taamatut sammineqarnera allamut saatinniarsimavarput. Annertuumillu oqallinnermik pilersitsivoq, Nunavormiunullu sanilerisatsinnut oqallinnermik atorfillit akornanni aamma aallartitsilluni. Oqallinnerit kingunerivaat piniagassanut tunngatillugu atorluaaniarnitsinnik suleqatigiinnerput aallarteqqikkatsigu. Nunattalu naalakkersuisui Nunavummilu naalakkersuisut juni-mi ataatsimiinnissaat pilersaarutaavoq, tassanilu eqqartorneqassapput nannunik, aarrinik puisinillu tunngatillugu suleqatigiinneq, Finn Karlsen oqarpoq.