Finn Karlsen Naalakkersuisutut ullumi ivertinneqassaaq

Inatsisartut immikkut ittumik ataatsimiinnissaanni, ualeq manna ataatsimut aallartittussami, Naalakkersuisunngortussaq nutaaq ivertinneqassaaq.
Allattoq Apollo Jeremiassen
januaarip 27-at 2014 04:54

Naalakkersuisutut nutaatut ivertinneqartussaq tassaavoq, Finn Karlsen, Siumut. Taanna Aalisarnermut, Piniarnermut Nunalerinermullu Naalakkersuisunngussaaq.

Aalisarnermut, Piniarnermut Nunalerinermullu Naalakkersuisoqarfik, Aleqa Hammondimit januaarip arferngannili akisussaaffigineqalerpoq, Karl Lyberthip, Siumumi siulittaasup tulliata, Naalakkersuisuujunnaarnerata kingorna.

Karl Lyberthip tunuarneranut pissutaaneruvoq, aalisarnermut tuunngasut arlalinnit siornartorsiorneqareersullu aamma Naalakkersuisut siulittaasuata aappaanik, Tom Ostermannimik, immikkut siunnersortissatut atorfinitsitsigaluarnerata kingorna tunuarniuteqarnissaanik inanneqarluni. Minnerunngitsumik Naalakkersuisooqataasunit Atassutikkunnit, Karl Lyberth isornartorsiorneqarnermi kingorna Naalakkersuisutut tununuarnissani qinerpaa.

Finn Karlsenip Naalakkersuisunngortinneqarnissaa akueritiinnagassaarpasippoq, tassami Naalakkersuisooqatigiit suli amerlannerussuteqalaarneranni tamanna allaqqussinnaanani.

Hans Enoksenip Naalakkersuisut siulittaasuunerata nalaani, Finn Karlsen Aalisarnermut, Piniarnermut Nunalerinermullu Naalakkersuisuusareerpoq.

Finn Karlsenimut unamminartuusussaassaaq, aalisarnermut inatsisissap akuersissutigitinnissaa. Tamanna pissaaq Inatsisartut upernaakkut ataatsimiinnerisa nalaani.

Aalisarnermut inatsisissap, aalisarnermut attuumassuteqartunut aamma innuttaasunut tusarniutigineqarnissaa, Naalakkersuisut siulittaasuata, Aleqa Hammondip januaarip 17-anni nalunaarutigaa ilaatigut ima siunertaqarluni.

- Aalisarnermut Naalakkersuisunngortussap, Finn Karlsenip inatsisissap qanoq isikkoqarnissaanik aalajangeeqataasinnaanera pingaartuuvoq, siunnersuutip aalajangiiffigineqarnissaanik kinguartitsinerminut atatillugu, Aleqa Hammond nassuiaavoq.

Aamma atuaruk