Finn Karlsen: Naalakkersuisut aalisarnermut politikkeqarput

Naalakkersuisut aalajangersimasumik politikkeqarnissaat, Inuit Ataqatigiit sinnerlugit inatsisartuni ilaasortap Ane Hansenip ujartorpaa, pilersaarusiorluakkamik ingerlatsisoqarnissaa piumasaralugu.

Aalisarnermut piniarnermullu naalakkersuisup, Finn Karlsenip, isornartorsiuineq ima akissuteqarfigaa:

- Tamakku naalakkersuisuni eqqartoreerpavut, aalisarnermut piniarnermullu ataatsimiititaliap siulittaasuata naalakkersuisut pilersaarutaat ilisimalluarpai. Ilisimasanilu nammineq, imminermininngaanniit saqqummersinneqartutut isikkoqartillugit saqqummersinniarai, Finn Karlsen oqarpoq.

Aalisarneq pillugu tunaartaqanngitsumik ullormiit ullormut aalajangiisoqartartoq Ane Hansen oqarpoq, aalisarnermulli naalakkersuisoq oqarpoq akerlianik pisoqartartoq:

- Pisassat pillugit ullormiit ullormut aalajangiisoqarneq ajorpoq. Qaleralittassat pillugit aalajangiisoqajaarsimasuuppat suliffissanik qulakkeerinnittoqarsinnaasimagaluartoq Ane Hansen oqarpoq.

- Tamannali eqqortuunngilaq, Finn Karlsen oqarpoq, nangillunilu:

- Januaarimi juunimiluunniit pisassiisoqarsimappat suliffissat aallartiffissaat allanngorsimanavianngikkaluarpoq. Aasarinnerani, imarornerani, qalerallit aatsaat pisarineqarsinnaapput, naatsorsuutigaaralu aggustip missaani tamanna pisinnaassasoq, Finn Karlsen oqarpoq.

Aalisarnermut siunnersuisoqatigiit suleqatigilluinnarlugit pisassat pillugit aalajangiisoqartartoq, Aalisarnermut naalakkersuisup erseqqissaatigaa, oqaatigalugulu aalajangeriikkat ataqqilluinnarlugit malinneqartartut:

- Aalisarnermut tunngasunik naalakkersuisut allanngortitsiniaraangamik aalisarnermut siunnersuisoqatigiit ataqqilluinnarlugit tusarniaqqaartarpaat, taamaattumik ullormiit ullormut aalajangertoqanngisaannarpoq, Finn Karlsen naggasiivoq.