Finn Karlsen: Naalagaaniarumatuujunngilanga

Finn Karlsenip parteeqatit akornanni naalagaaniarumatuutut isigineqarnini peqataaffigiumanagu, Atassummit tunuarpoq Siumumullu nuulluni.
aggustip 23-at 2010 15:51

- Atassutip siulersuisuuneranit naalagaaniarumatuutut isigineqartuartillunga tassaniiginnarsinnaanngilanga, allaat Atassutip immikkoortortaqarfiinit, aviisit aqqutigalugit taamatut unnerluutigineqarnerma kingorna misigisimavunga Atassummi peqataaqqissinnaananga, Finn Karlsen oqarpoq.

- Uanga naalagaaniarumatuujunngilanga, Finn Karlsen nassuiaavoq.

Tusagassiortunik katersortitsinermi issiaqataapput partiinit allanit nuunnerit ilaat, akornanniilluni Akitsinnguaq Olsen Inuit Ataqatigiinniit nuunnikoq, maannalu tassa Finn Karlsen talerperlertut oqaatigineqarsinnaasoq Siumumut nuulluni:

- Katersuuffiuvugut. Isummat qeqqaniippungut taannalu pingaartutut isigineqartariaqarpoq. Siumumi imanngilagut isuma ataaseq kisiat aporfigisaripput, taamaattoqanngilaq. Ammasuuvugut suleqatigineqarsinnaallutalu, tamannalu pingaaruteqartunik aalajangiiniarnerni avaqqunneqarsinnaanngitsutut isigaarput.

Siumup siulittaasua Aleqa Hammond oqarpoq.

2009-mi Inatsisartunut qinersinermi paasinarsivoq Atassut qinersisartuminit tununneqangajavissimasoq, tamatumalu kinguneranik Finn Karlsen Atassummit siulittaasutut tunuarpoq

Finn Karlsen Royal Greenland pillugu upernaaq politikkikkut anorersuarsiortinneqaleraluarpoq - taava apeqqut unaalissaaq, Siumut ima nukittutigaa allaat qinersinermi tullermi Finn Karlsen annaasinnaallugu?

- Qinersivimmi uani sulinissarput pingaaruteqartutut isigaarput. Qineqqusaaarutitsinnik qimatsinata sulinerput ilisimaneqaatigaarput, Finn Karlsenip nuunneranik tamanna allanngortitsinngilaq. Qinersinissap tulliuttup sulissutiginera pimoorullugu ingerlapparput, partiinit tamanit nuuffigineqartarnitta tamanna allangortinngilaa, Aleqa Hammond nassuiaavoq.

Politikkikkut sulinini allanngortinniarnagu Finn Karlsen neriorsuivoq:

- Uanga sulinera allanngotinnavianngilara. Siumumut nuukkama oqarfigineqarpunga uanga pissusera attatiinnassagiga, taamaattorli Siumup politikkia toqqammavigalugu ingerlanissannik oqarfigineqarlunga.

Finn Karlsenip Siumumut nunnera Atassutip Siumullu teknikkikkut suleqatigiinnerannut akornutaanavianngitsoq, Aleqa Hammondip oqaatigaa.

Finn Karlsenip ataatsimiititaliani ilaasortaaffimmini ilaasortaaginnassaaq, tassaasut Aningaasaqarnermut ataatsimiititaliaq aamma Siulittaasoqarfiup ataatsimiititaliaa.

Finn Karlsenip Siumumut nuunnerani Naalakkersuisooqatigiit amerlanerussuteqarnerat allanngortinneqanngilaq.