Finn Karlsen Lene Espersenilu oqaloqatigiipput

Aalisarnermut piniarnermullu naalakkersuisup Finn Karlsenip Inatsisinik atortitsinermullu danskit ministeriat Lene Espersen ullumi oqaloqatigissavaa.

Taakku oqaloqatigiissutigissavaat, puisit amiisa eqquteqqusaajunnaarnissaannik EU-p inatsisartuisa siunnersuutigisaat naalagaaffiup qanoq isumaqarfigissaneraa.

Sapaatip akunnera qaangiuppat EU kommissionip puisit amiisa eqquteqqusaajunnaarnissaat pillugu siunnersuut aalajangiivigisussaavaa. Taamalu pisoqaraluarpat annertuumik nunatsinnut eqquissasoq Finn Karlsen isumaqarpoq.

Finn Karlsenip danskit inatsisinik atortitsinermullu ministeriannik ataatsimeeqateqarnermini novembarimi Bruxelles-imiissimanini ilisimatitsissutiginiarpaa.

Taamani EU kommissionimi ilaasortat tikillugit kalaallit puisinniartarnerat pillugu nassuiaateqarfigai. Taamalu puisit amiinik eqqusseqqusiunnaartoqassappat qanoq ataatsimut isigalugu nunatsinnut kinguneqarnerlutsiginissaa nassuiaateqarfigalugu.

Nunatsinniit piniarnermut naalakkersuisup naatsorsuutigaa, EU-p siunnersuutaanut Danmarki aamma tapersersuiumaartoq.