Finn Karlsen: Kanngunarpallaaqaaq

- Inatsisartunut ilaasortat peqquserlullutik taasisarsimassappata kanngunarujussuaqaaq. Ajortuliorneruvoq qulaajaasoqartariaqarlunilu, Finn Karlsen oqarpoq.

Inatsisartunut ilaasortat Lars-Emil Johansen aamma Jonathan Motzfeldt siornatigut oqareerput pisimasoq pillugu misissuisoqartariaqartoq, Finn Karlsen maanna aamma taama isumaqarpoq, parteeqatigigaanni parteeqatiginngikkaluaraannilluunniit kinguneqartariaqarsoralugu:

- Isumaqatigilluinnaqqissaarpakka. Inatsisartunut ilaasortat sumik isumaqanngitsorpassuusugut pasineqarpugut, Atassutip siulittaasua oqarpoq.

Taassuma ilanngullugu oqaatigaa peqquserluttuliorsimasoqassappat pineqaatissiisoqartariaqartoq, partiillu apeqqutaatinnagit kinguneqartitsisoqartariaqassasoq.

Atassutip ileqqorissaarnermik pingaartitsisuunera Finn Karlsenip novembarip sisamaanni oqaatigaa, Ilaqutariinnermut Peqqissutsimullu naalakkersuisuusimasup Arkalo Abelsenip naalakkersuisutut tunuarniuteqartariaqarnerani taama oqarami.