Finn Karlsen: Isornartorsiueriaraluarneq kukkuneruvoq
Aalisarnermut, Piniarnermut Nunalerinermullu Naalakkersuisoq Finn Karlsen puisit amii pillugit Folketingimi ataatsimiittoqarnerani peqataanngimmat uggornaqaaq, taama aviisimi Sermitsiami tallimanngormat saqqummersumi Folketingimi Inatsisartunilu ilaasortaq Juliane Henningsen issuarneqarpoq.
Allattoq Mads Lynge
- Julianap taama isornartorsiueriaraluarnera kukkuneruvoq, taama piniarnermut naalakkersuisoq tusagassiutinut akissuteqarluni ippassaq allagaqaateqarpoq.
Taanna allakkamini oqarpoq, Kalaallit Nunaata Folketingimi ilaasortaatitaasa Folketingimi ataatsimiititaliani assigiinngitsuni Kalaallit Nunaata soqutigisai illersortussaagaat. Taamaammallu Juliane Henningsen kukkusoq pasilliiniarsaraluni Finn Karlsen suliamik pimoorussinnginnerarmagu.