Finn Karlsen: Great Greenlandip aqunneqarnera misissorneqarli

Great Greenlandip puisit amiinut tapiissutaasa ikiliartuaartinneqarnissaat pillugu nassuiaat naalakkersuisunit kissaatigineqartoq saqqummiunneqarpoq. Nassuiaatigineqartoq Naalakkersuisuni ilaasortap Finn Karlsenip Naalakkersuisuni ilaasortat sinnerisulli tusaatissatut tiguaa, taamaattorli Great Greenlandimik aqutsinikkut pissutsinik misissuisoqarnissaanik, Aalisarnermut Piniarnermullu naalakkersuisup siusinnerusukkulli piumasaqarnini aalajangiussimanerarpaa.

Great Greenland pillugu nassuiaammik Finn Karlsen ima naliliivoq:

- Tassa soorunami misissuisimanerup taassuma takutippaa taamatut isikkoqartoq tassa peqqutaavoq siullermik naalakkersuisuni aalajangerpugut naatsorsuuserisut attuumassuteqanngitsut misissuissasut.

Taama naalakkersuisuni isumaqatigiissutigineqartoqaraluartoq atorfillit allanngortitsisimasut kingusiinnakkut aatsaat paasivarput, Finn Karlsen oqarpoq.

Pisut naalakkersuisuni eqqartoqqinneqarmata naqqaniit misissuisoqarnissaa aalajangerneqarpoq.

- Kisianni aamma taanna allatut pisimavoq. Atorfillit piumaffigisimavaat naatsorsuuserisutoqaasa kukkunersiugai tiguinnassagaat misissorlugillu. Taamatut inernilerneqarnera qanoq isilluni uppernassuseqarsinnaava? Aalisarnermut Piniarnermullu Naalakkersuisoq aperaaq.

- Naatsorsuutit misissorneqarnissaat uagut pingaarnerpaatinngilarput, naamerluinnaq.

Nangilluni oqaatigaa sulisut ilisimasatik tunngavigalugit allakkatigut nassiuttagaat ingerlatsinermi pissutsit ajorneranik oqaluttuartut.

- Taakkuukua misissoqqugigut. Uannullu piniarnermut naalakkersuisutut pingaarnerpaavoq puisit amiinik tunisisarnerup misissorneqarnissaa. Ilisimannittut upernarsarlugu saaffiginnittuarput. Puisip amiisa Canadaminngaanneersut kalaallit Nunaannit pisiarineqartut amit kusanartut paarlaassorneqartarnerat uppernarsissallugu pingaartorujussuuvoq.

- Ilumoorsimappat sulisup taamatut oqalunnera Kalaallit Nunaanni piniartunut nikassaanerujorujussuuvoq, oqaluppummi Canadamigooq puisaataataasa amii kusanarnerpaajupput, kisianni sooq kalaallit piniartut puisittaasa amii Canadamiut amiutaannik paarlaassorneqartarsimassappat.

Aalisarnermut Piniarnermullu Naalakkersuisoq Finn Karlsen taama oqarpoq.

Great Greenlandimik aqutsineq pillugu sukumiisumik misissuisoqarnissaanik piumasaqarsinnaanissaq Atassummit eqqartorneqassasoq Finn Karlsen aamma oqarpoq.