Finn Karlsen: Espersen pillugu paasiniaassaagut
Naalakkersuisut ullut 13-it matuma siornagut aalajangerput nunarput Canadamit puisit amersisaleqqissasoq, tamatuma kingorna danskit inatsiseqarnermut ministeriat Lene Espersen nunatta Canadamit amersisalersisaqqinnissaanut sakkortuumik akerlilersuilluni TV-avisikkut oqarpoq nunarput tusaamanerlugaalertussanngortoq, tamanna pillugu naalakkersuisut eqqarsaqqeqqullugit inatsivoq. Lene Espersenip kingorna oqaatigaa akerliunini aalajangiusimagini. Aalisarnermut Piniarnermullu naalakkersuisoq Finn Karlsen ullumi attavigaarput, siullermik Lene Espersenip inatsinera malillugu naalakkersuisut eqqarsatigeqqinniarneqarnersut Finn Karlsen aperaarput, imalu akivoq:
-Isumaqarpunga taama eqqarsaqqinnavianngitsugut. Naalakkersuisut tamarmiulluta januaarimi piseqqusiunnaarnermiit piffissaq sivitsulersoq nalilersueqqissaariarluta aalajangerpugut, Ammerivik pisisinnaanermik periarfisseqqinneqassasoq.
Aperaarput Espersenip oqaaseqarneratigut nunatta tusaamaneqarnerata innarlerneqarsinnaanera ernummatigissannginneripput akivoq:
-Soorunami taamaattoqariataassagaluarpat assut nuannissanngilaq. Tusagassiuutit aqqutigalugit inuit ataatsiakkaat oqaaseqarnerat ikummarissarneqartuassappat uagutsinnut eqquinerluttussaavoq, taannalu soorunami aarlerinarsinnaavoq. Kisianni sapinngisaq tamaat qallunaat kalaallillu naalakkersuisui tassani paatsooqatigiinngillat, taamaallaanuna inatsiseqarnermut ministeri nammineq oqaaseqartoq. Oqaaseqarnerata nunatsinnit qisuariarfigineqarnera soorunami paaisinnaavara, kisianni isumaqarpunga iuppakajaartariaqanngitsugut qallunaat naalakkersuisuat ataaseq taama oqarpat.
KNAPK Inatsisartullu Piniarnermut Ataatsimiititaliaat piumasaqarput Naalakkersuisut danskit naalakkersuisuinut piaartumik saaffiginneqqullugit, Finn Karlsenili paasiniaaqqaarumavoq.
- Soorunami tamanna erseqqissumik paasiniartariaqarparput, ilumut qallunaat naalakkersuisuisa tamarmiullutik taanna oqaaserineraat imaluunniit inatsiseqarnermut ministeri kisimiilluni taanna oqaaserineraa. Ullumikkut maangaanniit aallarsinnaaguma oqarasuaammik pissarsisinnaaguma piaarnerpaamik oqartussaasut attaveqarfiginiassavakka.
Finn Karlsen erseqqissaavoq danskinut saaffiginninnisartik qularutigineqassanngitsoq. Oqarporli inatsiseqarnermut ministeri nammineerluni oqaaseqarsimanera imaluunniit naalakkersuisut sinnerlugit oqaaseqarsimanera saaffiginnissutissap isikkussaanut aalajangiisuussasoq. Kisianni Danmarkimi naalakkersuisut ataasiakkaat oqaaseqarnermikkut nunatsinnut ajoquseeratarsinnaanerat pillugu qallunaat naalakkersuisui oqaloqatigisariaqassagitik
Piniarnermut naalakkersuisoq Finn Karlsen oqarpoq. Nunatta Canadamit puisit amersisalernissaa pillugu oqallinneq nunatta tusaamaneqarneranut innarliilissappat, EU-mut aasaru isumaqatigiinniarnerit pinerisa nalaanni nunanut Europamiittunut paasisitsiniaasariaqalersinnaassallutik Karlsen oqarpoq. Taamaattoqassappat nunatsinni puisinniartarneq pillugu paasisitsiniaasoqassaaq, tamannalu aamma qangali pilersaarutigisimagini piareersimaffigineqartorlu Finn Karlsen oqarpoq.
