Finn Karlsen eqqartuussivimmut tunniunneqariaannaavoq
Suliaq Naalakkersuisunut ilaasortamut, Finn Karlsenimut tunngasoq Københavnimi Eqqartuussisuunermut suliassanngortillugu maanna nassiunneqarpoq.
Taama nalunaarpoq Kalaallit Nunaanni politimesterip tullersortaa, Bjørn Bay.
Kalaallit Nunaata ammeriviata pisortaa pillugu Finn Karlsenip oqaaseqarnera, Kalaallit Nunaanni Sulisitsisut Peqatigiiffiata politiinut suliassanngortippaa, suliakkiullu taanna politimesterip tullersortaata sapaatip-akunnerini kingullerni misissuataarsimavaa.
Great Greenlandip pisortaa ammerivimmi pinerluuteqarsimanerarlugu Finn Karlsen pisuutitsinikuuvoq.
Københavnimi Eqqartuussisuunermut suliakkiissut qanorpiaq suliarineqassasoq qinnutigisimanerlugu politimesterip Bjørn Bayip oqaatigerusunngilaa.
Naalakkersuisunulli ilaasortaq, Finn Karlsen, eqqartuussisulersuunneqassanersoq Københavnimi Eqqartuussisuunerup aalajangissavaa.
Finn Karlsen, Inatsisartunut ilaasortaanini pissutigalugu, unnerluutigineqarsinnaanngilaq. Eqqartuussivimmut tunniunneqassappat, eqqartuussisulersuunneqarnissaa Inatsisartut akuersissutigeqqaassavaat.
