Finn Karlsen Atassummi siulittaasunngorpoq

Partii talerperliunerusoq, Atassut, nutaamik ullumi siulittaasortaarpoq.

Atassutip nuna tamakkerlugu ullumi ataatsimeersuarnerani tamanna pivoq. Atassutip ataatsimeersuarnera Nuummi ingerlanneqarpoq.

Ilimagineqareersutut siulittaasunngorpoq manna tikillugu siulittaasup tullerisimasaa, Finn Karlsen.

Finn Karlsen ataasiinnarmit unammillerneqarpoq, unammillertaa tassaalluni Emilie Olsen, Sisimiuneersoq, Emilie Olsenili qinersisoqannginnerani nammineq tunuarpoq.

Piffissaq kingullerpaa atorlugu allat marluk siulittaasussatut sassaraluarput, taakku tassaallutik Ellen Christoffersen aamma Søren Alaufesen.

Ellen Christoffersen aamma Søren Alaufesen pingasunit tallimanillu qinerneqarput, siulittaasunngortorli Finn Karlsen 29-init qinerneqarluni.

Finn Karlsen oqarpoq, qinersinerup inernera ersarissoq nuannaarutigigini. Siulittaasutut suliassamisut siullertut eqqaavaa, partiimi suleqatigiinneq iluarsartuutissallugu.

Atassummi siulittaasutut Inatsisartuni sulinermini meeqqanut isumaginninneq, inissaqarniarnermi atugassarititaasut ilinniartitaanerlu sulissutiginiarpai.

Qinersinissaq Atassutip piffissami aggersumi piareersarniarpaa. Atassummilu siulittaasunngortup naalakkersuisut kajumissaarniarpai qinersinissaq suaarutigeqqullugu.