Finn Karlsen: -Akit assigiikkunnaartariaqarput
Suliffissanik pilersitsinissaq nunalli aningaasaqarnera siuarsartariaqarmat akit assigiikkunnaarsikkiartortariaqarsimapput, taama oqarpoq Atassutip siulittaasua Finn Karlsen, Atassutip inatsisartuni ilaasortaatitai, allaat inoqarfiit ilaannik inuerusaanertut aaqqissuussineq nalilerlugu uparuaareersullu.
Akit assigiikkunnaarnerata kingunerisai malunnarsigaluttuinnartut pillugit inatsisartuni ilaasortat Godmand Rasmussen aamma Kristian Jeremiassen ulluni kingullerni nutaamik nalilersueqqusipput.
Atassummi siulittaasoq Finn Karlsen erseqqissaavoq, nunap aningaasarsiornera pitsanngortikkumallugu, erngup innaallagissallu akiisa assigiikunnaarnissaat pisariaqavissimasoq. Taamaattumik isumaqarpoq inuit allatut ajornartumik nuuttariaqartarsinnaassasut:
- Soorunami akit assigiinngitsunngornerat tunngavigalugu allatut ajornartumik nuukkusuttoqartassaaq, kisianni taakku eqqarsaatigalugit naalakkersuisuni anguniagaqarpugut suliffinnik annertoorujussuarnik pilersitsiniarluta maanna illoqarfimmiinngitsumi nunagineqanngitsumi. 0’17 … nunagineqanngitsumi.
Atassutip siulittaasua nangilluni oqarpoq.
- Suliffissuarnik soorlu aatsitassarsiorfiusussani inoqarfioriinngitsuni aamma suliffissanik ataavartussanik sinerissami inoqarfioreersuni pilersitsiortornerit kingunerisaannik inuit suliffissaqarumallutik nutsertarumaarput.
Atassutip partiia liberaliusumik, tassa nammineersinnaassuseqartumik anguniagaqartumik suliniuteqartuuvoq. Akit assigiit atorunnaarsinneqarnerisa kingunerisai naalakkersuisuni aamma nalilersorneqassapput.
- Oqareerpugut, aamma naalakkersuisuni isumaqatigiittareerpugut - aamma inatsisartuni ilaasortani ilisimaneqarpoq – naliliisoqartussaasoq.
Ukioq manna naliliineq taanna pinngitsoornani saqqummiunneqassaaq, qanoq akit assigiikkunnnarneri sunniuteqarnersut takuniarlugu. Imaassinnaavoq allatut aaqqissuussisoqartoq, kisianni uanga naatsorsuutiginngilara qangatut akit Kalaallit Nunaat tamaat assigiilersinneqarnissaat, Finn Karlsen oqarpoq.
- Taanna pinngoqqinnavianngilaq. Taamaattoqassappat uagut tapersersuilluta partiitsinnik anguniakkatsinnik naapertuuttuunngitsumik, ingerlaannaq aamma oqarfigineqartussaavugut.
Finn Karlsenip erseqqissaatigaa, akinik assigiikkunnaarsitsinerup taama sukkatigisumik eqqunnissaanut Atassut aallaqqaammut isumaqataasimanngisaannartoq, kingunerisassai maanna takuneqarsinnaalereersut ilimagigamikkit. Akilli allanngortittariaqarnerat tunngaviusumik isumaqatigijuarparput, taamaattumik innaallagissap erngullu akiinik nalilersuisoqarnissaa pissangallutik aamma utaqqissavaat.
- Tassami naalakkersuisuni isumaqatigiippugut nalilersuineq ukioq manna ingerlanneqassasoq. Naliliisoqassaaq inuussutissarsiornermiut naalakkersuisoq saqqummiussissaaq,l kisitsisit tamaasa, akitsuutaasimasut aamma uuliap akia qanoq qaffatsigisimanera tamaasa.
Atassutip siulittaasua Finn Karlsen naggasiilluni taama oqarpoq.
Atassutip inatsisartuni ilaasortaatitai kisimik uparuartuinngillat, aammali Siumut inatsisartunik ilaasortaatitaat maanna nutaamik nalilersueqqusipput. Lars-Emil Johansen, Siumumi politikkikkut oqaaseqartartoq ullumi nalunaarpoq naalakkersuisut nalunaarusiamik inatsisartut upernaaru ataatsimiilerpata saqqummiussisariaqartut, ukiamut utaqqissunnagu.
