Finn Karlsen: Akisussaaffimmik tigusineq politikkikkut anguniakkanik qimatsinerunngilaq
- Partiitsinnut ilaasortaasimasut marluk partiimut allamut nuunnissaminnik aalajangersimasut paasivarput, tamannalu ataqqilluinnarparput, inuit namminneq kiffaanngissuseqarlutik pisinnaatitaaffigimmassuk namminerminnut naleqqussorisaminnut politikkikkut inissisimanissaminnut, taamaammallu taakku iluatsitsilluarnissaannik kissaappagut. Taamaattorli tusagassiorfiit aqqutigalugit tunngavilersuutiginiagaat ATASSUT-mit illuatungilertariaqarpavut, tassami ATASSUT-ip politikkia ”ilisarnarunnaarsimanerarlugu” aammalu partii kiffaanngissutsip aqqani suliunnaarsimanerarlugu ilaatigut tunngavilersuuteqarnerat tunngavissaqanngilaq, Finn Karlsen nassuiaavoq.
- ATASSUT-mit aalajangersimavarput akisussaaffimmik tigusiniarluta, tassa Siumumik Naalakkersuinikkut suleqatiginninniarluta, tamannali imatut isumaqanngilaq ATASSUT-ip politikkikkut anguniakkani qimassimagai, paarlattuanilli akisussaaffimmik tigusineruvoq anguniakkat tunngavigalugit sapinngisamik annerpaamik ingerlasoqarsinnaanissaa isumannaarniarparput, nassuiaavoq.
- Inuiaqatigiinni sanngiitsortatta sullinneqarnerat pillugu ATASSUT sumiginnaanerarneqarpoq, tamanna aamma ilumuunngilluinnarpoq, tassami Inatsisartuni Naalakkersuisunilu sulinermi inuiaqatigiinni sanngiitsortat ajunnginnerpaamik atugassaqartitaallutik inuuneqarnissaat qulakkeerniarlugu sulinerput unitsinngilluinnarlugu siunnerfilimmik sulinerput nangittumik ingerlatissavarput.
- Anoraa innuttaasunullu tusaruminarsinnaasut kisiisa tunngavigalugit sulinngilagut – akisussaassusilimmik sulivugut, tamannalu ingerlatiinnassavarput, ATASSUT sinnerlugu inussiarnersumik inuulluaqqusivoq Finn Karlsen, siulittaasoq.