Finn Karlsen: Akisussaaffik allamiippoq
- Paasitinneqarnissaa pingaartittorujussuugaluarpara, tamanna eqqartorneqalermat siullermik oqaatigineqarmat uanga akisussaaffigiga. Kisianni akisussaaffik Naalakkersuisup siulittaasoqarfianiippoq, Finn Karlsen oqarpoq.
Taassuma maanna aamma oqaatigaa Royal Greenlandip aningaasarliornera pillugu paasissutissanik isertuussinermik atorfilittaminik akisussaaffiliisimanani.
- Atorfilittakka taama pinikuunngilakka, Finn Karlsen oqarpoq.
Taamatulli oqarnera KNR-imut siusinnerusukkut oqaatigisaanut naapertuutinngilaq. Imatummi oqarami:
'Isertuussisimasutut juunip ulluisa tallimaanni pasillerneqarpunga. Taava naalakkersuisoqarfimmi pisortaaninnut kingorna paasiniaavunga, taannalu sulinngiffeqarluni aallaqqagaluartoq sianerfigaara paasiniaavigalugu. Taassuma ersarilluinnartumik oqarfigaanga isertuussaangaarmat uannulluunniit oqaatigisimanagu, Finn Karlsen oqarpoq.'
Finn Karlsenip akisussaaffik naalakkersuisut siulittaasoqarfianiinnerarpaa:
- Naalakkersuisut siulittaasuata atorfilittai tamakkuninnga akisussaasut partiit inatsisartuni ilaasortaatitaqartut ataatsimiinnerisa nalaanni aperivakka. Partiit siuttuisa tamarmik tusaavaat, Finn Karlsen oqarpoq.