Finn Karlsen: Akileraarutit qaffanneqassanngillat

Atassutip siulersuisuuneri Nuummi ataatsimeeqqammerput, akileraarutillu qaffanneqannginnissaat Atassutip aalajangiusimagaa kingumut oqariartuutigineqarpoq.

Aningaasanut inatsisissaq aappaagumoortoq 100 millioni koruunit sinnerlugit amigartoorfiusussaammat sipaartoqassasoq, akitsuutinik qaffaasoqarsinnaasoq, avataaninngaanniilluunniit aningaasanik aallertoqassasoq siulittaasoq oqarpoq. Finn Karlsen ima nangippoq:

- Ilumut pisariaqavippoq massakkut ukiup tulliani aningaasalissallugit taakku, imaluunniit sipaarutigineqarsinnaapput. Taamaanngippat akitsuutit qaffaavigineqarsinnaanissaat ammaffigalugit oqaatiginikuuarput. Apeqqutaaginnassaaq akitsuutit sorliit pineqarnersut, Finn Karlsen oqarpoq, nangipporlu:

- Pilersitanit ataavartussanit aningaasalersorneqarsinnaaneq periarfissatut aamma isigaarput, ujarlernerlu maanna ingerlapparput, Atassutip siulittaasua oqarpoq.

MIPI-p nalunaarusiaa pillugu oqaaseqarsinnaanngikkallarnerarput, pappilianngorlugit suli tigusaqarsimannginnamik, saqqummiunneqartulli tusaqqaaramigit nakeriallassimalluni Finn Karlsenip oqaatigaa.