Finn Karlsen: Aalisartut akiligassallit kisimik ajornartorsiorput

- Angallatit pineqartut tassaapput Namminersornerullutik Oqartussat avaqqullugit nunani allani Royal Greenland sillimmasiisoralugu sananeqarsimasimasut. Taakkua akisoorujussuupput, taamaammallu aalisartut qulit-20-t akornanniittut annertoorujussuarmik akilersuillutik. Tamannalu aalisartunut artukkiivoq. Taakkulu uagut akisussaaffitta avataaniikkaluartut ikiorserniarlugit suliniuteqarpugut, Finn Karlsen oqarpoq.

Taamaattorli KNAPK-p siunnersuutigisaatut aalisartut taakkua aningaaserivinnit atugaasa ESU-mut nuunneqarsinnaanerat Finn Karlsenip orniginngilaa.

- Ajornanngitsunnguuvoq oqassalluni taakkua aningaaserivinnit atugaat ESU-mut nuunneqartariaqartut, soorlu tamanna KNAPK-mit siunnersuutigineqartoq. Kisianni aalisartut qulit 20-llu akornanniittut aningaaserivinnit atugaat ESU-mut nuunneqassappata tamanna Namminersornerullutik Oqartussanut 50 millionit 100 millionit koruunillu akornanni aningaasartuuttaassaaq.

- Sinerissamut qanittumi aalisartut tamarmik ajornartorsiortutut isikkoqalersinniarneqarput, kisianni taamaanngilaq. Aalisartorpassuaqarpoq ingerlalluartunik, taakkuli oqallinnermi eqqaaneqarneq ajorput, Finn Karlsen oqarpoq.

Hendrik Sandgreen sinerissamut qanittumi aalisartut pillugit ippassaq oqaaseqartoq ullumikkut oqarpoq, Finn Karlsenip oqarneratut aalisartut ningittakkeersuutinik nutaanik angallatitaarsimasut kisimik ajornartorsiunngitsut.

- Aalisartut pisoqqanik angallatillit aningaaserivinnut taarsersuisut aamma aningaasarsiornikkut ajornartorsiorput, Hendrik Sandgreen ullaap oqarpoq.