Finlandimiu siulittaasunngorpoq
Siulittaasunngortoq tassaavoq Finlandimiu Kimmo Sasi, konservativit partiianneersoq, tassami piffissami aggersumi Finland siulittaasuutitaqartussaammat.
Kimmo Sasip erseqqissarpaa, Nunat Avannarliit Siunnersuisoqatigiiffianni piffissami aggersumi Issittoq sammisassanut pingaarnernut ilaassasoq. Taamaattumik Nunat Avannarliit Siunnersuisoqatigiiffiat, nunat tamalaat akornani suliniaqatigiiffittut namminersortutut, namminerisaminik aningaasalersorneqartutut siunissami ingerlanneqalernissaa sulissutiginiarpaa.
- Nunat Issittumiittut suleqatigiinnerannut ataatsimoorluta tapersersuiuarnissarput pingaaruteqarpoq, taannami nunat issittumiittut suleqatigiiffiattut pingaarnersaammat, Kimmo Sasi oqarpoq.
Taassuma ilanngullugu tikkuarpaa, EU Issittumut tunngasumik paasissutissiisarfeqalernermigut, Issittup inissisimaneranut nukittorsaaqataasinnaasoq.