Finlandimi saassussisoq nipaatsutut immikkukajaarlu pissuseqarnerarneqartoq

Politiillu killisiuinissaminnut tassani utaqqipput.

Finlandimi tv-qarfik taama paasissutissiivoq.

25-nik ukiulik, ilinniartuusoq politiinit aallaaneqarluni saassussinermi marlunngornermi unitsinneqarpoq. Angutip aallaaneqannginnermini arnaq inuusuttoq toquppaa arnallu arfineq-marluk ikilerlugit. Angutit marluk panamik aamma eqqorneqarput.

Angutip 25-nik ukiullip najugaqarfiani sanilerisaasa angut nipaatsuusoq immikkukajaarlu pissuseqartoq oqaatigaat. Angut ilassineqaraangami akinngisaannarsimavoq. Angut politiinit siornatigut ilisimaneqanngilaq.

Taamaammat angut pinerlunnermut aallarniisumik sianissutsimigut ajornartorsiuteqarsimanissaa ilimagineqarpoq.

Pinerliffigineqartut arfinillit pingasunngornerup ullaap tungaani suli napparsimmavimmi uninngapput. Uninngasunit marluk perulupput, peruluttullu aappaa pinerluttuulluni.

Marlunngornermi saassussisoqarnerani atuartut ilinniartitsisullu 15-init 48-nut ukiullit saassunneqartuupput.