Finlandimi ilinniarnertuunngorniarfimmi eqqaassisoq

Ualimut eqqaasiunnaartoqarmat inuit arlallit toqutaasimasut oqaatigineqarpoq.

Ilinniartut qimarngutsinneqarneranni politiit ilinniarfimmik ungusisimasut ualimut oqaatigaat, ulorianartorsiorneq qaangiuttoq eqqaassisorlu toqoreersoq. Kisianni qanoq ililluni toqusimanera oqaatigineqanngilaq.

Finlandimi tusagassiorfiit politiit oqarsimanerarpaat eqqaassinermi inuit arfineq marluk toqutaasimasut. Kisianni nalunaarut tamanna uppernarsarneqanngilaq.

Siusinnerusukkut politiinit nappasimmavimmillu oqaatigineqaraluarpoq ataaseq aallaaneqarluni toqutaasimasoq, sisamallu aallaaneqarlutik sakkortuumik ikilerneqarsimasut. Ilinniarnertuunngorniarfimmi ilinniartut oqaatigaat, ilinniartut marluk ilinniartitsisorlu ataaseq toqutaasimasut.

Aallaasersortoq ilinniarnertuunngorniarfimmi ilinniartuusoq, aalajangersimasumik pissusilersorsimavoq. Ilinniartitsisut ilaata oqaluttuaraa init atuartitsiviusut tulleriiaarlugit orneqattaarsimagai. Matu kasuttorfigeriarlugu nilliaatigaluni eqqaassisarsimavoq.

Aamma eqqaassinissani piffissami sivisulaartumi piareersarsimavaa qanorlu pilersaaruteqarnini oqaluttuarisimavaa. Sapaatip akunnerisa marluk matuma siornagut qarasaasiami nittartakkami You Tubemi quppernerminik pilersitsisimavoq atserluni ’Sturmgeist89’.

Marlunngormat You Tubemut videumik ikkussivoq – video taanna taasimavaa ’Jokela High School Massacre’ immaqa kalaallisut ’Ilinniarnertuunngorniarfimmi Jokela-mi toqoraaneq’mik taasinnaasarput. Videumi ilinniarfik takutinneqarpoq, taava angut sakkulik assilineqarpoq, taassumalu aallaasini assiliiviup tungaanut saatippaa.