Filmip Eksperimentip takuteqqaarneqarfissaa ullulerneqarpoq
Filmi septembarip qulingiluaanni Katuami takuteqqaarneqassaaq. Filmimi pineqarput meeqqat 22-t oqaatsiminnik kulturiminnillu piiaaffigisaasut ilaquttaminnillu annaasaqartut, tassagooq ”qallunaanngorsakkatut” pitsaasutut maligassiuiniassammata.
Aalajangerneq qallunaat isumassarsiaat malillugu Landsrådimit 1950-imi inaarutaasumik atuuttussanngortitaavoq.
Meeqqat ilaat nunaminnut uteqqinngisaannarput, sinneri ukioq ataaseq qaangiummat Kalaallit Nunaannut uterput, Nuummilu Børnehjemmimut inissinneqarlutik. Tassani najugaqassapput kalaallini inuiaqatigiinni maligassiuisutut akulerunnissamik tungaanut.
Peqqissaasoq Gert, Ellen Hillingsøemit inuttaaffigineqartoq, filmimi børnehjemmimut pisortatut toqqarneqarpoq.
Filmiliortartoq Louise Friedberg tassaavoq meeqqat kalaallit 22-t pillugit alianartuliamik pilersitseqqittoq, Tine Bryldip atuakkia ”I den bedste mening” filmiliornerminut isumassarsiffigisimavaa.
Filmimi kalaallit arlallit peqataapput, ilaatigut isiginnaartitsisartoq eriniarsortartorlu Nukâka Coster Waldau peqataavoq, taassumalu saniatigut Paniaraq R. Søltoft, Nukaaraq Margit Davidsen, Kristian Falck-Petersen aamma Domilia Marianne Síngertât peqataapput.
