Filmiortoq: Allat isumaat aamma pissarsiaqarfiusarput
Qallunaap filmiliortartup Anne Regitze Wivelip nunarput pillugu filmiliaa ”Menneskenes Land”, kalaallisuunngorlugu ima taaneqarsinnaasoq; Inuit Nunaat, kalaallinit assut isorineqarpoq. -Avaanngunarpallaaqaaq, Nuummi Katuami ippassaq unnukkut filmi takutinneqareersorlu oqillitsitsisoqarnerani arlallit oqarput.
-Filmiliaq tusagassiortorpalaartumik suliaanngilaq, inuilli ilaatinneqartut oqaaseriumasaannik isumaannillu oqaluttuarinninnertut paasisariaqarluni. Kalaallit Nunaanni piffissami aajangersimasuni pisut pillugit oqaluttuarusussimavunga tamannalu ajornaatsuinnaasimanngilaq. Filmip iluaqutissartaraa isummanik avataaneersunik aamma pissarsiaqarnissaq, danskit isumaannik tusalaarnissaq. Filmi danskit Kalaallit Nunaata sumut ingerlaneranut paasisaqarusunneranik imaqarpoq, Anne Regitze Wivel erseqqissaavoq.
