Filminik takutitsinermi Kalaallit Nunaat immikkut sammineqassaaq
Tysklandimi Lübeckimi filmfestivaleqalerpat Kalaallit Nunaat pillugu ukiuni kingullerni 100-ni filmiliat, takutinneqassapput. Filmfestivali "Nordiske Filmdage i Lübeck"-imik taaguutilik, novembarip ulluisa sisamaanni aallartissaaq.
Allattoq Mads Lynge
oktobarip 25-at 2009 17:24
Kalaallit filmiliaat aliikkutassiaq siulleq "Nummioq", ukioq manna takuteqqaarneqassaaq.
Skandinaviallu avataani nunat avannarliit filmiliaat pillugit festivalit annersaata kingumut qiviarnertaani Kalaallit Nunaata immikkut sammineqarnissaanut tamanna tunuliaqutaavoq.
- Tusarakku Kalaallit Nunaata nammineq filmiliaa aliikkutassiaq ukioq manna takutinneqaqqaassasoq isumassarsiaq pilerpoq. Soqutiginarsorivara paasiniassallugu 1926-miilli tyskit filmiliaannit "Milak den grønlandske fanger"-imit ullumikkumullu Kalaallit Nunaat pillugu fillmiliaat qanoq pisimanersut, filmit oqaluttuarisaanerannik ilisimatooq Jörg Schöning Sermitsiamut oqarpoq.
