Filminik naliliisartup Eskimo Divap nunatsinnik takutitsinera nuannaraa
Filminik naliliisartup, Per Juul Carlsenip filmimi Kalaallit Nunaat ’tusaamasamit alutornartumit’, DJ Aqqalu Engellimit minnerunngitsumillu illoqarfiit tikitaasa ilaanni isiginnaartumit nuannarinnittumit ersersinneqartoq nuannaraa.
Per Juul Carlsenip ilitsersuisup Lene Stæhrip ‘assiliivia najunngisaqanngitsoq’ nersorpaa, ’ileqquminilli pissusilersoriaasiminillu ilisimasaqarnerunissaa kinaassutsiminillu takutitsinerunissaa’ kissaatigigaluarlugu.
- Lene Stæhrilli assiliiviata, Nuka Bisgaardip pukusuani ukiut arlallit ikkusimasimarpasittup, oqiliallannartumik Kalaallit Nunaannit, isummanik pigiliutiinnakkanik kisiinnangajammi tusarfigisartakkatsinnit, takusartakkatsinnit allaanermik takutitsivoq, Per Juul Carlsen allappoq.
Aamma atuaruk VIDEO Nuka the Diva Danmarkimi takuteqqaarneqartussanngortoq
Filminik naliliisartuttaaq Nuka Bisgaardip kalaallillu allat Danmarkimi isummanik pigiliutiinnakkanik naapitsisarnerat nassuiarpaa, oqaatigalugu nunani allani soorlu Spaniami kalaallit ajunnginnerujussuarmik qisuariarfigineqartartut.
- Filmi isiginnaarlugu nuannaalersitsivoq. Tassami Nukap pissusilersornera uagut danskit kisitta pigisutut eqqarsaatigisartagarput Nukap takutippaa tamanna allat aamma ileqqorisinnaagaat, taamaalilluta Kalaallit Nunaata qanoq ittuussusaanik takorluuisarnerput allanngortingaatsiarlugu, Per Juul Carlsen allappoq.
Aamma atuaruk VIDEO Eskimo Diva iluatsitsilluartoq
’Eskimo Diva’ Danmarkimi septembarip qulingani takuteqqaarneqassaaq, Københavnimi Empire Biomi, Aarhusimi Øst for Paradisimi Koldingimilu Nicolai Biomi takutinneqassalluni.
Aamma atuaruk Qulaarpaa Mr. Gay Pride: Nunatsinni nikeriarnerujussuaq pisimavoq