Filminik naliliisartoq: Nuummioq ajunngilluinnarpoq

- Filmfestivalerpassuaqarpoq, ilami hornorujulippassuupput, Sundance-ili festivalinut pingaarnerpaanut ilaavoq, Cannes-imi, Berlinimi Venedigimilu festivaleqartarneratulli pingaaruteqartigaluni. Filmillu arlaat Sundance-imi ajugaaniutivinnernut peqataagaangat qisuariarnerpassuit aallartittarput, filmilu nunarsuatsinni festivalertunut allanut taamaalilluni peqataalersarluni, Bo Green Jensen oqarpoq.

Assersuutitut taavaa naggueqaterput Inuk filmini ilitsersuisoq, Zakarias Kunuk. Taassuma filmiliaa, Atanarjuat - The Fast Runner - Cannes-imi festivalimi akissarsisinneqarpoq, nunarpassuarnilu filmertarfinnut kingorna nassiussuunneqarluni.

Filmi tusaamasanik inuttaqarnersoq Sundance Film Festivalimi apeqqutaatinneqarneq ajorpoq, filmilli qanoq imaqarnera manuskriptialu toqqaanermi aallaavigineqartarlutik. Filmip nunanit USA-p sanilerisaaninngaaneersuunissaa aamma pingaartinneqartarpoq, taamaammat Kalaallit Nunaata Amerikap nunavittaanut qaninnera aamma eqqarsaatigineqarsimassaaq, Bo Green Jensen naliliivoq.

Taanna aamma isumaqarpoq, Nuummioq-p Sundance-imi peqataanerata Danmarkimi filmertarfinnut nassiussuuneqarsinnaanissaanut periarfissat pitsaanerulersissagai.