Filmiliortut nutaamik peqatigiiffittaarput
Kalaallit Nunaanni filmiliornermik suliaqartut immikkut peqatigiiffittaarput. Peqatigiiffiup pilersinneqartup siulittaasua siulleq tassaavoq Deluxus Studio-mik piginnittoq Lars F. Andersen. Peqatigiiffik ataatsimeersuarnermi siullermi marlunngorneq novembarip 20-iani pilersinneqarpoq.
Peqatigiiffiup siunertaraa Kalaallit Nunaanni filmiliornermik suliaqartut katersornissaat. Inuussutissarsiutigalugu filmiliornermik suliaqartut ingerlatsisullu peqatigiiffimmi ilaasortaassasut siunertaavoq.
- Filmiliornerup tungaatigut peqatigiiffimmik pilersitsisoqarneratigut Kalaallit Nunanni filmiliornerup tusagassiuutitigullu suliaqarnerup ukkatarineqarnissaa piumavarput. Neriuutigaarput piginnaasat ineriartortinneqarsinnaassasut saniatigullu sulissutigerusupparput attaveqaqatigiinnerup pitsanngorsaaffigineqarnissaa, suliassat taamaalillutik nunanut allanut massakkutut amerlasuut nassiunneqartarnerat pinngitsoortinneqartalerniassammat, siulittaasoq Lars F. Andersen oqarpoq.
Nunatsinni filmiliornermik suliaqartut sulinerminni atugarisaasa pitsanngorsaaffigineqarnissaat peqatigiiffiup sulissutiginiarpaa.
- Sulinermi atugarisat pitsanngorsaaffigineqarnissaat pingaaruteqarpoq, Kalaallit Nunaanni kulturikkut, paasissutissiinikkut aliikkusersuinikkullu filmiliarineqarlutik suliarineqartartut amerlanerujussuanngorniassammata, siulittaasoq Lars F. Andersen oqarpoq.
