Filmiliortunut arfininngorpat nersornaasiisoqassaaq

Arfininngorpat unnukkut arfineq marlunut kikkut tamarmik Nuummi Katuami akeqangnitsumik filmernissamut, filminillu nersornaammik agguaassinermut peqataanissamut periarfissaqarput.
Allattoq Karsten Sommer
februaarip 26-at 2016 05:15

Tamanna nunatsinni filmiliornermik ingerlatsisut peqatigiiffiata FILM.GL-ip pingajussaaneerluni peqatigiiffiup nersornaataanik Innersuarmik agguaassinerani pissaaq.

Filmiliornermut nersornaat ukiumut ataasiarluni inummut, suliamut suliniummulluunniit, ukiup siuliani nunatsinni filmiliornermut annertusiartortumut pingaaruteqarsimasumut tunniunneqartarpoq.

Nersornaammut tunniussinermut atatillugu danskit filmiliaat pissanganartulersaarut “Gudsforladt”, kalaallip filmiliortartup filmiliornermilu assiliisartup Ulunnaq Ingemannip assilisarisimasaa ineriartortitseqataaffigisimasaalu takutinneqassaaq.  

Filmiliaq nersornaatisisimasoq taanna danskimit filmiliortartumit Kaster Juhlimik Ulunnaq Ingemann qanimut suleqatigalugu suliarineqartoq, arfininngorpat Katuami aaqqissuussinermi Ulunnaq Ingemannimit ilisaritinneqassaaq.

Filmertitsereernerup kingorna kalaallit “Oscar”-iat ukioq manna kimut tunniunneqassanersoq filmerianut oqaatigineqassaaq.

Tumit Productions 2013-imi siullersaallutik nunatsinni filmiliornermi piginnaanngorsaanermik suliaqarnertik pillugu nersornaatisipput, 2014-imilu Anorak Film nipilersortartut Sume pillugu piviusulersaarummik filmiliornerminnik nersornaatisipput.