Filmiliortunit malittarineqaleraanni
- Inuulillaramali aatsaat taama tupatsigaanga. Lastbiilit pingasut-sisamat takkuteriasaarput, filmiliornermut atortunik useqarput sulisunillu 30-inik ilaasoqarlutik, taakkulu tamarmik illuma iluaniittussaapput. Taava paasitinneqarpunga illora 1968-imisut isikkoqartilersinniaraat. Isiginnaarutiga nutaarpasittullu allat garagemut nuuppaat. Filmiliortut ulluni pingasuni maaniipput sunalu tamaat allanngortiterlugu, allaanngilaq taamani 1968-imi, Marius Schmidt filmiliornerit pillugit taama oqaluttuarpoq.
Filmimi Idealistenimi timmisartup Thule airbasemi 1968-imi nakkarnera oqaluttuarineqarpoq, Marius Schmidtip oqaluttuaa danskillu tusagassiortup Poul Brinkip ajutoortoqarneranik saliinermillu qulaajaasimanera tunngavigineqarlutik.
Marius Schmidt ullumikkut 82-inik ukioqarpoq inuunermilu ilarujussuani Thulemi sulisartuusimasut taarsiivigineqarnissaannik sulissuteqarsimalluni. Radiop qinngornerinik ulorianartunik akulinnik saliineq sulisartut peqqissusaannut annertuumik kinguneqarsimavoq.
Danskip tusagassiortup Poul Brinkip Marius Schmidt 1986-imi saaffigaa. Takkulu qanittumik suleqatigiilerput ikinngutigiilerlutillu.
- Poul Brinkilu pitsaalluinnartumik suleqatigiippugut. Suliaminut Cavlingip nersornaasiuttagaanik tunineqarpoq. Taavali ajoraluartumik arpatsilluni kinguninngua toquvoq. Filmi taassuma uangalu suliaq pillugu ilungersorsimanitsinnut eqqaassutissaassaaq.
Thulemi sulisartuusimasut 1995-imi tamarmik immikkut 50.000 kr.-inik taarsiivigineqarput, Marius Schmidtilli suliaq ingerlateqqippaa ilaatigut Inuit pisinnaatitaaffii pillugit eqqartuussivimmut Strasbourgimiittumut suliassanngortillugu. Ullumikkulli suliniuteqarnini unitsissimavaa.
- Peqqissinnaanngilagut. Suut tamaasa misilereerpagut - allatut ilioqqissinnaanngilagut, oqarpoq.
Isiginnaartitsisartoq Peter Plaugborg, tusagassiortutut Poul Brinkiusuusaassaaq, Søren Mallingilu Marius Schmidtiusuusaassalluni. Idealisten Christina Rosendahl ilitsersuisoralugu Toolbox Filmimit suliarineqarpoq aappaagulu aggustip qaammataani takuteqqaarneqassalluni.
