Nunatsinni filmiliortartut peqatigiiffiata Film.gl-ip siulittaasuata, Klaus Georg Hansenip, naalagaaffeqatigiinneq pillugu piviusulersaarusiortunit qinnuteqarfigineqarsinnaasunik nutaanik aningaasaliissoqarnera soqutiginartortaqarsoraa. Assi: Kunuk Hansen

Filmiliortartut siulittaasuat: Danskit qulliuniartut kisimik oqaluttuarisaanerput unikkaassanngilaat

Kalaallit naalagaaffeqatigiinneq pillugu isumaannik saqqummiussinissaq aningaasaliissutinik nutaanik qinnuteqarfigineqarsinnaasunik agguaanermi pingaartinneqassasoq, Film.gl-ip siulittaasuata neriuutigaa.

Nunatsinni, Savalimmiuni Danmarkimilu filmiliortartut aningaasaliissutinik nutaanik, danskit aningaasanut inatsisaannut decembarimi ilanngunneqartunik, qinnuteqarsinnaalerput.

Aningaasaliissutit nutaat naalagaaffeqatigiinneq pillugu piviusulersaarutinik filmiliortunut tapiissutaasassapput, taakkualu kalaallinit savalimmiormiunillu qinnuteqarfigineqarsinnaannerat tusarluarnarpoq. Nunatsinni filmiliortartut peqatigiiffiata Film.gl-ip siulittaasua, Klaus Georg Hansen, taama oqarpoq.

- Film.gl-ip tamaanilu filmiliortartut tamanna soorunami nuannaarutigeqaat. Taamaalilluta aningaasaliissutinik taakkuninnga agguaanermi akisussaasuusussaq, Det Danske Filminstitut, aqqutigalugu tapiiffigineqarnissamik qinnuteqarsinnaalerpugut, taanna oqarpoq.

Oqaluttuarisaanermik isiginninneq nutaaq

Naalagaaffeqatigiinneq ilisimaneqarneruleqqullugu aningaasaliissutinik nutaanik immikkoortitsisoqarpoq, aningaasallu taakkua ukiuni sisamani tulliuttuni agguaanneqassapput. Kalaallit naalagaaffeqatigiinneq pillugu isumaannik saqqummiussinissaq aningaasaliissutinik taakkuninnga agguaanermi pingaartinneqassasoq, Klaus Georg Hansenip neriuutigaa:

- Filmiliat sunik sammivillit tapiiffigineqartassanersut apeqquterujussuuvoq. Danskit Kalaallit Nunaata Danmarkillu attaveqatigiinnerat pillugu oqaluttuartarnerat ukiuni kingullerni 300-ni malunnaqisumik saqqumilaarput, taamaammat aningaasat taakku danskit isaannaanniunngitsoq allalli aamma isaannit piviusulersaarutiliortoqartalerpat nuannissaqaaq, Klaus Georg Hansen oqarpoq.

AAMMA ATUARUK Film.gl: Kalaallit Nunaat pillugu akiuunneq soorunami festivalimi itigartinneqarpoq

Danskit norskillu ajoqersuiartortissimasaat, Hans Egede, isummaminik erseqqissaanermini assersuutigaa. Hans Egedemi nunatsinnut ukiut 300-t matuma siorna tikippoq. Tamannalu filmiliortup isummani tunngavigalugu assigiinngitsunngorlugu oqaluttuarisinnaavaa. Tamanna assersuutigalugu nalliussisinnaagaa, malunnartissinnaagaa assuarisinnaagaaluunniit, Klaus Georg Hansen nassuiaavoq.

- Hans Egedep Kalaallit Nunaannut tikinnera assigiinngitsorpassuartigut unikkaarneqarsinnaavoq, unikkaallu assigiinngisaartuunissaat pingaaruteqarluni. Naalagaaffeqatigiinnitta oqaluttuarisaanera aalajangersimasuinnarmik sammiveqanngitsumik unikkaarneqartalerpat angusarput angisoorujussuussaaq, taanna oqarpoq.

Ajunngisaarnerusoq

Kulturimut politikki nunatta Savalimmiullu namminneq akisussaaffigilernikuummassuk, danskit naalakkersuisui nunatsinni Savalimmiormiunilu filmiliortartunut aningaasaliinissartik immini pisussaaffiginngikkaat, taanna oqarpoq. Taamaammat danskit naalakkersuisoqatigiivisa naalagaaffeqatigiinni filmiliortartut tamarmik aningaasaliissutinut nutaanut qinnuteqarnissamik periarfissaqartitsinerat ajunngisaarnertut isigaa.

AAMMA ATUARUK IA og Siumut: Dansk finanslov sikrer gode initiativer til gavn for Grønland    

Aningaasaliissutilli 27 millionit koruuniusut, nunani pingasuni filmiliortartunit qinnuteqarfigineqarsinnaasut, taakkua silarsuaannut qanoq iluaqutaasinnaatigippat?

- Filimiliaq ataaseq 50 millionit koruuneqarsinnaalluarpoq, taamaammat 5 millionit koruuninik ukiumut tapiissutisineq qinnuteqartorpassuarnut naammaqqajarneq ajoraluartut isumalerujussuusarput. 

- Aningaasaliissutinit tapiissutisineq isumalerujussuusarpoq. Aningaasaliissutinimmi allanit tapiissutisinissamut periarfissiisarpoq, Klaus Georg Hansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat