Filmiliortartoq Mogadishumi toqutaavoq

Somaliap illoqarfiisa pingaarnersaanni Mogadishumi Sverigemiu filmiliortartoq aallaaneqarluni toqutaavoq. Taassuma tuluit TV-eqarfiat Channel 4 sullillugu filmilioriartorsimasoq, Ritzau tusarliussivoq.

Taqqavani eqqisseqatigiinnissaq anguniarlugu isumaqatigiissusiorniartut innuttaasunit tapersersorneqarnerat toqutaasup filmiliareruttulerai angutip inuit akornannit sassarluni filmiliortartoq sakiaagut aallaallugu toqussimagaa takunnittut oqaluttuarput.

Danskit tusagassiortut attartortillutik tusagassiisartut marluk sapaatip-akunnerani kingullerni marlunni toqutaasumik suleqateqarsimasut takunnittut oqaluttuaat ilumoornerarpaat. Danskit tusagassiortui taakku tupaqqagaluarlutik ajunngillat.

Sverigemiu sooq toqunneqarsimanersoq suli paasineqanngilaq. Tuluit TV-eqarfiutaata qanoq pisoqarsimanera paasinialeruttorpaa.

Takunnittuusimasut oqarput muuamaamik upperisallit siuttuata ingerlaaqatigiinermi oqalugiartup toqutsineq tusaramiuk erngerluni assuarliilluni oqarsimasoq.

Sverigemiu filmiliortartoq Stockholmimi inunngortoq affarmik tuluusimavoq. Nunarsuaq tamakkerlugu tigumanartorsiorfiusut isumaqatigiinnginnerillu filmiliarisarpai arlaleriarlunilu suliani pillugit akissarsitinneqartarluni.