Filmiliorniat tapiiffigineqarput
Nunatsinnut tunngasunik filmiliornermik misilittagaqareersut Namminersornerullutik Oqartussanit filmiliornissaminnik aningaasanik tapiiffigineqarput.
Taakkua ilagaat 25-nik ukiulik filmiliortarfimmik ISI filmimik piginneqataasoq maannalu Danmarkimi ilisimatusarfimmi filmit pillugit ilisimatusartoq Qivioq Kern Kreutzmann.
Taassuma filmiliassaa katillugu 600.000 koruunit missaanni naleqartussaq katillugit 250.000 koruunit tungaanut fondtinit assigiinngitsuniit maannamut tapiiffigineqarpoq.
Taanna aperaarput filmip pitsaassusissaa ilimagisamit ajornerussasorineraa.
- Soorunami akissaqarnavianngilanga nipaata iluarsinissaanut nipilersuutiliornissamullu minnerunngitsumillu teknikkikkut assigiinngitsunik torrallaaniartoqarsinnaagaluarpoq, taamaaliornissanulli aningaasat tunniunneqartut naammanngillat, Qivioq K. Kreutzmann oqarpoq.
Taanna neriuuteqarsimagaluarpoq filmi naammassereernerata kingorna filmip siammarterneqarnissaata piviusunngornissaanik.
- Neriuutigigaluarakku nunatsinni Danmarkimilu premiereqartitsinissara, kisiannili suli imaassinnaavoq allaninngaanniit aamma isertitaqariataartunga oqarpoq.
Qivioq K. Kreutzmann aperaarput, kalaallinik inuusuttunik nunani allaniittunik filmiliassaa imaqarniarmat sooq taamatorpiaq sammiveqartinniarneraa.
- Atuarnera pissutigalugu massakkut Danmarkimi najugaqarallarpunga, tamaaniinninni malugisarpara kalaallit qanoq isiginiarneqartarnersut. Nallinnartutut isiginiarneqartarput, soorlu; imerajuttutut, imminoorajuttutut, atugarliortut il.il. Tupinnanngilarli taamatut isiginnilertarmata tassami tusagassiutitigut takusartagaat ajortuinnaasarput. Ukualu isiginnaagassiortartut avataaneersut aamma ajortuinnarnik takutitassarsiortarput. Aap, soorunamilu aamma ilumoorpoq tamakkuninnga ajortunik nunatsinni atugaqartoqartartoq, kisianni uggoraara assut nunatsinnut tunngasut nuannernerit takutinneqarneq ajormata, Qivioq K. Kreutzmann oqarpoq.
Taanna erseqqissaavoq nammineq kalaallillumi allarpassuit ulluinnarni inuunerat taakku takorluugaanniit allaaneroqisoq.
- Imaanngilarmi tuperni najugaqarlutalu suli qajartorluta inuusugut. Illuinnarni najugaqarlutalu pivugut. Taavalu inuusuttortagut nunanut allanut ilinniariartorlutik pisarput, nunani allani ilikkakkatik nunatsinnut nassartarpaat iluaqutigalugillu, taama oqarpoq, ISI filmimik piginneqataasoq Qivioq Kern Kreutzmann, allat tapiiffigineqartut tassaapput, Nordlys Fonden, Isak Kleist, Miki Jacobsen, Kunuk Platou kiisalu Karen Littauer.
