Filmiliassaq "ajunnginnerpaamik isumaqarluta" tapiiffigineqarpoq
Filmip taaguutissaa tassaavoq “ajunnginnerpaamik isumaqarluta”, tassani aallaavigineqarluni Danmarkip naalagaaffiata kalaallit meerartaannik 22-nik 1950-ikkut aallartilaarneranni angajoqqaavinit pinngitsaaliilluni peersitsinera. Meeqqat ilaqutaanniit peersillugit Danmarkiliartinneqarput, inuiaqatigiinni kalaallini siuttussatut piukkunarsarlugit atuartinneqarnissaat siunertaralugu. Taakkua Nunatsinnut utermata, Nuummi meeqqanut angerlarsimaffimmut inissinneqarput, ilaatigullu kalaallisut oqalunnissaat inerteqqutigineqarluni.
Filmi “ajunnginnerpaamik isumaqarluta” 35-nik ukiullip Louise Friedbergip, 2005-imili Det Danske Filmskolimit ilitsersuisutut naammassigamili perngaammik filmiliarissavaa. Tine Bryldip atuakkiaa taaguuteqartoq “Ajunnginnerpaamik isumaqarluta” atuareerlugulu filmiliarinissaa Louise Friedbergip isumassarsiaraa.
- Atuagaq atuarakku tiguartittorujussuuvunga. Taamaattorli filmi Tine Bryldip atuakkiaanik toqqaannartumik filmiliaassanngitsoq Sermitsiamut siorna oqaatigaa. Ellen Hillingsø peqqissaasutut Gert-itut pingaarnertut inuttaassaaq, taannalu Nuummi meeqqanut angerlarsimaffimmi, kalaallit meerartaasa “ineriartortinneqarfissaani” pisortaavoq.
