Filmiliariteqataasut pingaarninngulaassapput

Ilulissani filmertarfiup "Biffen"ip nunatsinni filmertarfinni kisiartaalluni filmi Qivittoq nutarterneqaqqammersoq takutissamaalerpaa. Filmi Ilulissani Saqqamilu immiussaasoq takutinneqassaaq februarip arfernaniit qulingiluaata tungaanut.

Tamanna pisussanngorpoq naak ilisimaneqareeraluartoq Qivittoq dvd-nngornermini amerlasuunik Ilulissani tunisaasimasoq.

- Taamaattumik takutitsinissarput nalorninartoqarsimagaluarpoq, taama Biffenimi ulluinnarni aqutsisoq Jesper Hansen KNRimut oqarpoq.

- Taamaattumik taamanikkut filmip immiunneqarnerani tunuatungaani inuttaaqataasut sisamat aggersarsimavagut taamanikkut misigisaminnik oqaluttualaaqullugit, taama Jesper Hansen oqarpoq.

Filmimi pisimasuutitap nalaani aalisartuunermut ikaarsaariartoqarpoq. Ilulissani aalisakkanik tunisassiorneq misilittagaqarfigineqareerpoq nunaqarfilli Saqqaq filmimi Sermiliutinneqartoq aatsaat piniartuunermiit ikaarsaariartulerpoq.

Nordisk Filmip qujassutitut filmi Qivittoq taamanikkut Ilulissat kommuneanut tunissutigaa iluliarmiorpassuillu meeraanerminnit Qivittoq ilisimalereerpaat katersortarfimmi takutinneqallattaasarmat. Amerlapput filmip oqaasertaanik alanngaarsinnaasut nuannarisarlugu filmimi oqaatigineqannginneranni oqaatigisarlugit.

Maanna filmi assitamigut iluarsaanneqareerluni dvd-nngorluni saqqummerpoq filmertarfimmilu takutinneqartussanngorluni. Piffissallu ingerlanerani katersortarfiup issiavii manngertut filmertarfiup issiaviinik maavaartunik taarserneqarsimapput kulturikkut illorsuup Sermermiut filmertarfiani.