Filmiliaq nutaaq aalassassutaaqaaq

decembarip 05-at 2006 10:43

-Afghanistanimiut naalliutsinneqarsimanerat pillugu naalakkersuisut paasissutissaateqanngillat. Ministeriuneq Anders Fogh Rasmussen taama oqarpoq, filmi piviusunik tunngavilik “Den Hemmelige Krig” ippassaq takuteqqaarneqareersorlu.

Filmimi pineqarpoq danskit sakkutuuisa afghanistanimiut tigusatik 31-usut amerikamiut sakkutuuinut ingerlateqqissimagaat. Tamatuma kingorna, tigusat amerikamiut sakkutooqarfianni Kandahar-imi naalliutsinneqarsimapput. Tamannali naalakkersuisut ilisimasaqarfiginngikkaat ministeriuneq oqarpoq.

- Naalakkersuisut isumaqartuarput, siunissamilu aalajangiusimajuassallugu, sorsunnermi tigusat inuppalaartumik pineqassasut. Tamanna ima paasisariaqarluni, tigusanik naalliutsitsisoqassanngitsoq. Tunngaviusumik isummiussamut amerikamiunittaaq malinikkumapput. Folketingimi apeqquteqartoqaraangat naalakkersuisut tamanna aamma erseqqissartuartarpaat. Naalakkersuisut Folketingimut eqqunngitsunik paasissutissiisimanerarneqarnerat sakkortuumik taamaattumik tunuartippara.

Filmimi oqaatigineqarpoq, danskit sakkutuui arlaleriaqalutik tigusanik amerikamiunut ingerlatitseqqiisarsimasut, tamannali illersornissamik suliaqartunit ilumuunnginnerarneqarpoq.