Filmi takuteqqaarneqarpoq
Filmi ”Menneskenes Land - min Film om Grønland", ilitsersuisup Anne Wivel-ip nunatsinni ullutsinni inuuneq pillugu qanga pisartunik akullattaarlugu filmiliaa Qallunaat Nunaanni takuteqqaarneqarmat filminik naliliisartunit assut nuannarineqarlunilu nersualaarneqartoq, nunatsinni Katuami massakkorpiaq takutinneqaqqaarpoq.
Weekendaviisimi naliliisartoq Marianne Krogh, filmi Danmarkimi sapaatip-akunneri pingasut matuma siornagut takutinneqaqqaarmat ilaatigut allappoq filmi annertuumik aliasunnartunik imaqaraluarluni qaamanermik neriunnermillu aamma imaqartoq.
Filmi aqagu ualikkut sisamanut arfinernullu tullianik takutinneqassaaq marsillu 30-ani kingullermik takutinneqassalluni.
Filmip Katuami ullumi takuteqqaarneqarneranut atatillugu tamanut ammasumik aqagu sapaammi unnukkut oqallitsitsisoqassaaq, filmiliortup Anne Wivel-ip allallu aggersakkat peqataaffigisaannik.