Filmi Nuummioq nunarsuatsinni sumi tamaani nersualaarneqartuarsinnarpoq

Taamaalilluni sapaatip akunnerata tulliani Oscarinnatsitsinissaq sioqqullugu ippassaq festivaleqarnermi, filmimi pingaarnertut inuttaasoq, Lars Rosing, angutit filmiliaritittartut akornanni filmiliaritillaqqinnerpaatut toqqarneqarpoq. Nuummioq Oscarinnattussatut aamma piukkunneqarluni unammeqataassaaq.
Allattoq Apollo Jeremiassen
januaarip 17-at 2011 16:52

Californiami Palm Springsimi film-festivalertoqarnerani filmit tuluttuujunngitsut allat 39-it Oscarinnattussatut piukkunneqartut akornanni Nuummioq takutinneqarmat Lars Rosing filmiliaritillaqqinnerpaatut toqqarneqarpoq.

Ualigaalu pingaarnertut inuttaasimasoq tupassimaqisoq, nuannaaqisorli oqaluupparput.

Filmimi "Nuummioq"-mi Lars Rosing, sanasuuvoq Malimmik atilik, toqungajalerluni paasitinneqartoq. Larsillu Maliup misigissusaanut pulaniarsimangaarami, allaat iluminiit katanniarnera ajornakusoortissimavaa.

Maliulli kinaassusaa maanna katassimallugu, Lars Rosing oqarpoq. Filmiliornerminnilu, minnerunngitsumillu Maliup kinaassusaa puiguumisimallugit maanna filmi isiginnaaqqissamaarlugu oqarpoq.

Filmi ullutsinni Kalaallit Nunaanni inuiaqatigiit qanoq ittuunerannik takussutissaasimasoq - sulilu takussutissaajumaartoq - Lars Rosing isumaqarpoq.

Filmit tuluttuujunngitsut 40-t Oscarinnattussatut piukkunneqeartut akornanni angutit pingaarnertut inuttaasuni filmiliaritillaqqinnerpaatut ippassaq toqqagaasup, Lars Rosingip oqaluttuaa Ulf Fleischerimit taamatut kalaallisuunngortinneqarpoq.

Filmit sorliit tallimat, qaammatip tulliani Hollywoodimi Oscarinnanniuttunut ilaassanersut sapaatip akunnerata tulliani aalajangerneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq