Filmi Nuummioq Amerikami soqutigineqarluarpoq

Filmip takutinneqarnissaanut bilitsit nungunneqarsimasut, filmimik ilitsersuisoq, Mikisoq Lynge, maannakkut Amerikami Utah-miittoq, oqarpoq. Filmip takuteqqaarneqarnissaanut bilitsit ulluni kingullermi 14-ini tuniniarneqarneranni bilitsit tamarmik tunineqareersimapput, taammaattumillu isiginnaariarniartut isumalluarunarput, tamannalu qilanaaraarput, Mikisoq Lynge oqarpoq. Filmip Nuummioq filmiliarineqarnerani peqataasut ilitsersuisut suleqataasullu maannakkut Amerikami naalagaaffimmi Utah-imi illoqarfimmi Park City-miipput, filmip nittarsaanneqarneranut peqataajartorlutik. Filmi filminik nittarsaassinermi The Sundance Filmfestivalimi sisamariarlugu takutinneqassaaq. Arfininngorpat ullup qeqqata qeqqanut takuteqqaarneqassalluni. Filmi Park City-mi angallavigineqarnerpaasumi arfininngornermi inuit sulinnginneranni takutinneqartussaavoq, tamannalu ajunngilluinnarpoq, Mikisoq Lynge oqarpoq. Filmilianik nittarsaassineq The Sundance Film Festival Amerikami filminik nittarsaassissarnerit annertunerit ilagaat, tassanilu peqataanermi pingaaruteqarpoq tusarneqarnissaq filmiliallu tunineqarnissaat pingaaruteqarluni, minnerunngitsumillu filmiliat pitsaanerpaat akornanni akissarsisitsinissaq. Filmi Amerika Avannarlermi filminik tuniniaasartumut tunineqarpat tamanna nuannissagaluarpoq, pisiumasunillu saaffiginittoqareerpoq, piserusuttulli filmi takoqqaartariaqarpaat, Mikisoq Lynge oqarpoq. Filminik pisinissamik soqutiginnittut, filmip takutinneqarnerani ilitsersuisut filmilioqataasullu peqataatinneqarneq ajortut, Mikisoq Lyngep oqaatigaa.Filmi Nuummioq USA-mi Park City-mi arfininngorpat takuteqqaarneqarpat, Nive Nielsen aamma Simon Lynge tusarnaartitsissapput.