Filmi kalaallinik inuttalik nuannarineqarluarpoq

Gøteborgimi nunani avannarlerni filminik takutitsisaqattaarnerit annersaanni, filmi nersornaasigaasoq “Prize of the Pole” Sverigimi nuannerineqaqisumik sapaatip akunnerata naanerani takuteqqaarneqarpoq.

Sapaatip akunnerata naanerani filmi marloriarlugu takutinneqarmat filmertitsisarfik inunnik ulikkaavillugu ornigarneqartarpoq, aallarniisoralugit filmip ilitsersuisua svenskiusoq, Staffan Julén, kiisalu filmimi pingaarnertut inuttaasoq - Avanersuarmi piniartoq qilaatersortartorlu Robert E. Peary II.

Filmip, Copenhagen Filmfestivalimi Amnesty Internationalip ataqqinninniarluni nersornaasiuttagaanik qanittukkut nersornaatisisup, malittaraa Robert E. Peary II-p aataqqiini tumisiorlugu USA-mut ullumikkut angalanera - aataqqiia tassaavoq Robert Peary 1800-kkut naalerneranni qaqortunit amilinnit siullersaalluni Qalasersuarmik tikitsisimasoq.

Filmimi oqaluttuarineqarput avanersuarmiut arfinillit, Pearyp New Yorkimukaassai, taakkua ilagalugu nukappiaraq Minik. Ilisimasassarsiortup ernutaata siulimi nallinnartumik inuuffigisimasai filmimi takuniarpai – tamarmik, Minik kisiat pinnagu – Pearymit New Yorkimut pissunneqarnerminnit ukiualuit qaangiuttut napparsimalerlutik toquffigisaat. Filmi aviisimi Dagens Nyheterimi pitsaasutut eqqartorneqareerpoq, sapaatip akunnerilu arlalialuit qaangiuppata Stockholmimi takuteqqaarneqassaaq, tamatumalu kingorna Danmarkimi takutinneqassalluni, ilaatigut kalaallit illuutaanni Københavnimiittumi. filmi nunatsinni maajimi takuteqqaarneqassaaq, sinerissami sumiiiffinni arlalinni takutinneqassalluni, naggataatigullu Qaanaami takutinneqassaaq, tassa filmimi inuttaasut arlallit najugaqarfigisaani.