Filmi kalaallinik inuttalik Montrealimi takutinneqarpoq

Kalaallit franskillu filmiliaat, Inupiluk kalaallinit piniartunit Kullorsuarmiunit marlunnit pingaarnerut inuttaaffigineqartoq, Canadami Montrealimi ulluni makkunani takutinneqaqattaarpoq.
aggustip 04-at 2014 13:28

Montrealimi filmertaarfinni filmit takutinneqartarneranni, kalaallisut oqaluttunik tusaaneq naliginnaasuunngilaq. Kisianni tassa ulluni makkunani kalaallit oqaasii filmertarfinni tusaaneqarsinnaapput, tassami ukioq manna filmfestivalimi Inuit filmiaat imaluunniit Inunnut filmit tunngasut sammineqarput.

Filmit aqqanillit ilaatigut Inuktitut annerusumik minnerusumilluunniit oqaasertallit takutinneqaqattaassallutik.

Inupiluk
Filmi kalaallit franskillu filmiliaat, Inupiluk tassaavoq piniartut Kullorsuarmiut marluk pillugit oqaluttuaq. Ole Eliassen aamma Adam Eskildsen filmimi malinnaavigineqarlutik. Taakku Parisimut tikeraarput, sapaatip akunneranik ataatsimik sivisutigisumi nalunngisamminnik tikeraarsarneqareerlutik.

Kullorsuarmiut piniartut soorumani kalaallisuinnaq oqluttuupput, Parisimilu takornariartinneqarput franskinit inuusuttunit marlunnit, franskisuinnarlu oqaaseqartunit, taamaakkaluartoq peqataasut tamarmik tupinnaannartumik nuannersumik pissarsiaqarfigisaannik.

Zacharias Kunummit filmiliaq
Filmi alla Akilinermiumit filmiliullaqqissutsimigut tusaamasaasumit, Zacharias Kunummit filmiliarineqartoq, Inuit Amalu-mik ateqartinneqartoq aamma takuneqarsinnaavoq.

Taassuma oqaluttuaraa, eqqillit Cree-t Inuillu Nunavimminngaanneersut, akornanni qanga akerariissimaneq. Ukiut 200-it matuma siorna, Inuit eqqillillu akunnerminni aaqqiagiinngittarneranni, illuatungeriinni meeqqat arnallu aallarunneqartarsimapput. Akerariinnermi sorsuuttoqarneq ajorsimavoq taamaallat inuit ataasiakkaat saassunneqartarsimallutik.

Filmimi tassani takuneqarsinnaasut ilagaat, Inuit eqqillillu Cree-t eqqisseqatigiinnissaq anguniarlugu pujortaammik pujortaqatigiittut, taamaaliornerat siorna filmiliaalluni. Tassani inuiaqatigiit taakku marluk isumaqatigiipput saammaasseqatigiinniarlutik.

Inuit pillugit filmiliat saniatigut Montrealimi takuneqarsinnaasunut ilaapput, aqqusinerni nipilersornerit tungaasigut festivali.