Filmi Inuk Nunatsinni takutinneqassaaq
Maannali tassa piffissanngorsimavoq Inuk-p filmertarfinni takutinnissaanut. Filminik ilitsersuisoq suliarinnittorlu Jean-Michel Huctin taama nalunaarpoq Inuk Atlantikup avannaamiut illuanni ippassaq takutinneqarmat.
- Pisuni immikkut ittuni nunani tamalaani Inuk takutittarsimavarput, pingaartumik festivalini. Assorsuaq tulluusimaarutigaarput Inuk angerlaassinaanngoratsigu. Uatsinnummi pingaartorujussuuvoq filmip Kalaallit Nunaanni takutinnissaa nunani allani filmertarfinni takutinnginnerani, Jean-Micheal Huctin oqarpoq, taassumalu filminut najoqqutassiaq suliarisimavaa amerikamioq Mike Magidson suleqatigalugu.
Inuk filmiuvoq aliikkutassiaq Uummannami meeqqat angerlarsimaffianniittut pillugit inuttaralugillu. Nunanilu tamalaani takutinneqartarnermini Inuk 17-riarluni nersornaatisisarsimavoq. Taamatullu angalaneq pissanganarsimasoq Jean- Michel Huctin oqarpoq. Inuk ilaatigut takutinneqarsimavoq Woodstock-imi, Savannah-mi, Alaskami Anchorage-mi, Parisimi Nice-miilu. Taakku saniatigut Uummannami Nuummilu takutinneqarpoq 2010-mi ICCp ataatsimeersuarnerata nalaani.
Filmimi inuttaaqataasoq Ole Jørgen Hammeken ippassaq filmip takutinneqarnerani aamma peqataavoq. Nunatsinnilu takutinneqartussanngornera assigiinngitsunik misigissutsinik qaffakaatitsiffiginerarpaa.
- Soorunami pingaaruteqarpoq filmimi ilaagaanni nalilersorsinnaanaguli pitsaasumik takutitsisimanerluni. Takullugu peqqusiileqinarpoq. Aarleqqutigaara iluatsinngitsoornissaa nuannarineqarnissaalu neriuutigalugu, oqarpoq.
Hollywood-mi suliffeqarfissuit ilaata Inuk soqutigilersimavaa filmimillu suliarinnittut neriuutigaat Nunatsinni takutinneqareerpat aamma USA-mi takutinneqarnissaa. Maanna filmi filmertarfimmi takutinnissaanut iluarsaanneqaleruttorpoq, filmimit maanna takutinneqartartumit naannerulluni allamillu nipilersuuteqarluni.
Aningaasaliisussat naammatsissappata pilersaarutit malillugit Inuk Nunatsinni illoqarfinni anginerni takutinneqassaq. Nuummi takuteqqaarneqassaaq maajip aqqarngat.
