Filmi 'Inuk' nersornaasiinermi ingerlalluarnissaa ilimagineqarpoq
Filmi 'Inuk' nunani assigiinngitsuni 20-nik nersornaaserneqartoq, nunat allamiut filmiliaanni Oscar-innattussatut innersuunneqartut tallimat akornannut inississinnaaneranut periarfissaqarluarpoq.
Nunatsinni Oscar-imik nersornaasiinissamut innersuussisartoqatigiinni ilaasortaq Peter Jensen isumaqarpoq.
Nunatsinni Oscar-innanniuttunut innersuussisartoqatigiit aappassaa nunat allamiut filmiliaannik Oscar-innattussanik innersuussipput.
Filmi pisimasuimmik aallaaveqarpoq, nukappiaraq 16-nik ukiulik Nuummi najugaqartoq meeqqat angerlarsimaffiannut Uummannamiittumut nuutsinneqartoq.
Filmimi oqaluttuarineqartoq, nunarsuarmi sumiikkaluartumi pisinnaavoq nunatsinni Oscarinnanniuttunut innersuussisartoqatigiinni ilaasortaq Peter Jensen oqarpoq.
-Filmi oqaluttualiaavoq pisimasuvimmik filmiliaanani, taamattorli Nunatsinni pisut aallaavigalugit filmi-liaavoq, taamatut suliarineqarnera nunatta avataaniit isiginiarneqarneranut akornutaanavianngitsoq, Peter Jensen isumaqarpoq. Filmimi oqaluttuarineqartoq isiginnaassallugu pissanganaateqarpoq Nunatsinnni Oscarinnanniuttunut innersuussisartoqatigiinni ilaasortaq oqarpoq.
Filmi Nuummi Uummannamilu immiunneqarpoq, filmiliornermi peqataasut Kalaallit Nunaanni pinngortitap peqqarniissinnaanera misigivaat. Filmip immiunneqarnerani 3o-nik issittoq immiussisarput.
Filmimi inuttaasut tamarmik inuussutissarsiutigalugu isiginnaartitsisartuunngillat, amerlanerit inuusuttuaraapput, meeqqat angerlarsimaffianni Uummannami najugaqartut.
Oscar-innattussatut innersuunneqarnera nunatta avammut nittarsaanneqarneranut iluaqutaassasoq, Peter Jensen-ip neriuutigaa.
-Filmi kalaallit nunaanni immiunneqarpoq torrallataallunilu, filmip Kalaallit Nunaata avataanit ilisarisimalluarneqalernissaannut iluaqutaassaaq aamma Kalaallit Nunaanni filmiliortoqartarneranut aamma takutitseqataavoq, Nunatsinni Oscar-innanninnermut innersuussisartuni ilaasortaq Peter Jensen oqarpoq.
Filmi Inuk Mike Magidson-imit ilitsersorneqarpoq, Ole Jørgen Hammeken, filmimi pingaarnertut inuttaasut ilaat aamma Jean-Michel Huctin-imit najoqqutassiortuullutik. Ann Andreassen Meeqqat Angerlarsimaffianni Uummannami ningiu producer-iuvoq.
Oscar-imik nersornaasiineq USA-imi februarimi pissaaq, neriunniarta filmi 'Inuk' nersornaaserneqartunut ilaajumaarpoq.
